Karlmaður hefur verið dæmdur í þriggja mánaða skilorðsbundið fangelsi fyrir ofbeldi gegn unnusta sínum með dómi Héraðsdóms Norðurlands eystra sem féll í desember en var birtur í dag.

Ákærði var sakaður um ofbeldi í nánu sambandi, en til vara líkamsárás, fyrir að hafa aðfaranótt 15. júní 2024 ógnað lífi, heilsu og velferð unnusta síns og sambýlismanns með alvarlegum hætti. Ákærði var sagður hafa ráðist á sambýlismann sinn, tekið hann hálstaki með annarri hendi og lamið hann ítrekað í andlitið með hinni. Við þetta hlaut sambýlismaðurinn mar á vinstra augnlok og það hafði blætt inn á augað, punktblæðingar framan á háls og áverka á báðum handleggjum.

Ákærði játaði sök fyrir dómi og taldi dómari ekki tilefni til að efast um að játning væri sannleikanum samkvæm. Ákærði mótmælti því ekki að brotið teldist ofbeldi í nánu sambandi. Dómari horfði til þess að ákærði hafði hreinan sakaferil, játaði brot sitt skýlaust og hafði leitað sér sálfræðiaðstoðar. Þó yrði einnig að horfa til hættustigs árásarinnar sem var þó nokkuð og til þess að árásin átti sér stað á sameiginlegu heimili hans og sambýlismanns og var til þess fallin að vekja mikla ógn hjá brotaþola. Því þótti refsing hæfilega ákveðin þriggja mánaða skilorðsbundið fangelsi.