Tveir menn hafa verið ákærðir fyrir að hafa sett á svið umferðarslys í Hafnarfirði. Tvær bifreiðar skemmdust og eru mennirnir sakaðir um að hafa reynt að svíkja út tryggingabætur.
Mennirnir eru á þrítugsaldri og báðir af erlendu bergir brotnir, annar búsettur í Reykjavík en hinn á Ítalíu. Lögreglustjórinn á höfuðborgarsvæðinu hefur gefið út ákæru á hendur þeim fyrir tilraun til fjársvika vegna atviks sem átti sér stað á gatnamótum Breiðhellu og Gjáhellu sunnan við Vallahverfið í Hafnarfirði mánudaginn 5. apríl árið 2021.
Í ákærunni eru þeir sakaðir um að setja á svið árekstur í því skyni að svíkja út kaskótryggingu og lögbundna ökutækjatryggingu tveggja bireiða hjá VÍS.
Annar þeirr ók bifreið norður Gjáhellu og stöðvaði akstur við gatnamótin í um 40 sekúndur. Þá ók hann hægt í veg fyrir bifreiðinni sem hinn ók, norðvestur Breiðhellu, og lentu bílarnir saman á gatnamótunum sjálfum.
Mennirnir undirrituð tjónstilkynningu sama dag og annar þeirra sendi hana inn til VÍS í tölvupósti. Áætlaður kostnaður af yfirtöku bifreiðanna var annars vegar 800 þúsund krónur og hins vegar 400 þúsund.
Lögreglustjórinn á höfuðborgarsvæðinu telur að blekkingum hafi verið beitt í málinu. Krefst embættið að mennirnir tveir verði dæmdir til refsingar og greiðslu alls sakarkostnaðar.
Þar sem ekki hefur tekist að birta öðrum manninum ákæruna var fyrirkall birt í Lögbirtingarblaðinu. En það er sá sem er búsettur á Ítalíu. Er honum gert að mæta fyrir dóm þann 29. október næstkomandi. Sæki hann ekki þing verður fjarvistin metin til jafns við að hann játi brot sitt og verði dómur felldur að honum fjarstöddum.
