Fundur í kjaraviðræðum Eflingar við Samtök fyrirtækja í velferðarþjónustu fer fram hjá ríkissáttasemjara á mánudag, en nokkrir fundir hafa þegar verið haldnir. Krefst Efling sambærilegra launahækkana og í síðustu kjarasamningum annarra hópa.
Sólveig Anna Jónsdóttir, formaður Eflingar, segir að ef niðurstaða fáist ekki á fundinum fari af stað undirbúningur verkfallsaðgerða.
RÚV greinir frá.
„Undirmönnun og ofurálag er viðvarandi vandamál á hjúkrunarheimilum og hefur ömurleg áhrif á starfsaðstæður Eflingarfélaga,“ segir Sólveig Anna.
Kjarasamningar hafa verið lausir frá því í vor, en um 2.300 félagar í Eflingu starfa við umönnun á hjúkrunarheimilum, 82,5% þeirra eru konur.
„Staðan er sú að í það minnsta tíu ár hafa viðmið um mönnun ekki náðst. Það hefur haft þær afleiðingar að Eflingarfólk þarf einfaldlega að taka á sig sífellt fleiri verkefni, hlaupa hraðar og vinna meira. Nú er svo komið að við ætlum að krefjast þess að raunverulegar úrbætur komi svo þetta ástand líðist ekki lengur. Við erum ekki tilbúin að skrifa undir fjögurra ára kjarasamning, líkt og við höfum gert fyrir hönd annarra, nema að ásættanleg lausn finnist,“ segir Sólveig Anna í samtali við Vísi.
