Fjórir einstaklingar, þrír karlar og ein kona, sitja nú í gæsluvarðhaldi til 27. september samkvæmt úrskurði Héraðsdóms Reykjavíkur í dag.
Fjórmenningarnir eru grunaður um að hafa átt hlut að innbrotum í tvær verslanir ELKO á höfuðborgarsvæðinu um helgina. Brotin áttu sér stað á sunnudagskvöld og aðfaranótt mánudags. Málin voru tilkynnt lögreglu í gærmorgun en önnur verslunin er í Lindunum í Kópavog og hin í Skeifunni. Mbl.is greindi frá því í gær að helst hafi farsímum verið stolið í innbrotunum.
Samkvæmt tilkynningu lögreglu var miklum verðmætum stolið í innbrotunum en fjórmenningarnir voru handtekin á höfuðborgarsvæðinu og á Keflavíkurflugvelli. Þrír til viðbótar eru jafnframt í haldi lögreglu vegna málsins en ekki liggur fyrir hvort gæsluvarðhalds verði krafist yfir fleirum. Allir sjö sakborningarnir eru erlendir ríkisborgarar.
Rannsókn lögreglu er umfangsmikil og farið hefur verið í húsleitir auk þess sem hald hefur verið lagt á tvö ökutæki, en lögreglan gefur ekki frekari upplýsingar um málið að svo stöddu.
