Enn og aftur er Ísland notað til að fela slóð netglæpa og vafasamra athafna. Nú hefur bandarískir leyniþjónustufulltrúar upplýst að Rússar hafi birt falsfréttir um forsetaframbjóðandann Kamölu Harris og falið slóð sína í gegnum Ísland.
Engum dylst að Vladímír Pútín vill að Donald Trump vinni forsetakosningarnar í nóvember. En Repúblikanar hafa hótað að draga úr stuðningi við Úkraínu, sem myndi gera Rússum auðveldara fyrir að hernema landið. Verður Kamala Harris kjörin forseti verður stuðningi við Úkraínu áfram haldið.
Hafa rússneskir hakkarar, með tengsl við stjórnvöld í Kreml, orðið uppvísir af því að reyna að hafa áhrif á bandarísku kosningarnar. Meðal annars með því að birta og dreifa falsfréttum og fölsuðum myndskeiðum af Harris.
Nú hefur bandaríska leyniþjónustan rakið falsfréttasíðu til Íslands. Það er nýstofnaða stöð sem kallaðist KBSF-TV og átti að vera fréttastofa í San Francisco.
Þann 2. september var birt falsfrétt þar sem sagt var að Kamala Harris hefði keyrt á konu og flúið af vettvangi árið 2011. En þá var hún ríkissaksóknari Kaliforníu fylkis. Í falsfréttinni var einnig myndband þar sem mátti sjá konu fullyrða að Harris hefði keyrt á sig og skilið sig eftir lamaða.
Fréttin var algjörlega upplogin og umrædd vefsíða búin til nokkrum dögum áður en hún var birt. Engu að síður var henni dreift víða, einkum á samfélagsmiðlasíðum hægrimanna í Bandaríkjunum.
Að sögn leyniþjónustunnar ODNI bera Rússar ábyrgð á falsfréttinni og myndbandinu sem henni fylgdi.
„Þetta efni er í samræmi við aðrar tilraunir Rússa til þess að styrkja stöðu hins fyrrverandi forseta [Trump] og veikja stöðu varaforsetans [Harris] og Demókrataflokksins, meðal annars með samsæriskenningum,“ sagði fulltrúi ODNI í yfirlýsingu.
Lénið kbsf-tv.com var skráð hjá fyrirtækinu Namecheap þann 20. ágúst síðastliðinn og heimilisfangið skráð í Reykjavík. Namecheap hefur skráð vefsíður í gegnum fyrirtækið Withheld for Privacy á Kalkofnsvegi 2. Hafa meðal annars ýmsir netglæpamenn falið slóð sína með þessum hætti, svo sem til fjársvika og að dreifa hatursáróðri.
Lögreglan segist ekkert geta gert þar sem engin gögn eru geymd á Íslandi. Mál Withheld for Privacy hafa verið rædd í að minnsta kosti þremur ráðuneytum en stjórnvöld hafa hins vegar ekkert gert í málinu. Lögreglan fær reglulega fyrirspurnir frá erlendum lögregluembættum um Withheld for Privacy og því hefur hún látið útbúa sérstakt svarskjal til að senda þeim.
Forsvarsmenn tæknirisans Microsoft greindu frá því í síðustu viku að Rússar væru að beina spjótum sínum að Harris með falsfréttum og fölsuðum myndböndum. Í skýrslu fyrirtækisins var þessi starfsemi rakin til hópa sem kallast Storm-1516 og Storm-1679 og hafa tengsl við Kreml.
Meðal annars var áðurnefnt myndband af hinum sviðsetta árekstri nefnt í skýrslunni. Varaði Microsoft við því að aðferðir sem þessar myndu aðeins færast í aukana.
