Maður gekk heldur klæðlítill, eða öllu heldur kviknakinn, eftir Suðurlandsvegi fyrr í dag nálægt afleggjaranum inn í Heiðmörk, að sögn mbl.is, en DV hefur eins borist myndskeið af uppákomunni.

Vegfarendur ráku upp stór augu þegar þeir óku framhjá manninum, enda var hann í fyrsta lagi fótgangandi á vegi fyrir akandi umferð og í öðru lagi var hann nakinn, um hábjartan dag. Annar maður var með í för en sá var í buxum.

Á myndbandi sem nú er í dreifingu af atvikinu má heyra að jafnvel börn urðu vitni að athæfinu, en álykta má að uppátækið hafi ekki vakið lukku því  kallað var til lögreglu sem sést á einu myndbandi leiða manninn af götunni og inn í lögreglubíl.

Rétt er að geta þess að athæfi sem þetta getur í vissum tilvikum flokkast sem blygðunarsemisbrot en í almennum hegningarlögum segir: Hver sem með listugu athæfi særir blygðunarsemi manna eða er til opinbers hneykslis skal sæta fangelsi allt að 4 árum, en fangelsi allt að 6 mánuðum eða sektum ef brot er smávægilegt.

Af orðalagi ákvæðisins má þó álykta að ekki nægi það eitt að vera nakinn á almannafæri heldur þarf eins að vera um lostugt athæfi að ræða. Hæstiréttur komst til dæmis að því árið 1984 að það væri ekki blygðunarsemisbrot að bera þjófhnappana í glugga bifreiðar, slík háttsemi væri til þess fallin að valda opinberu hneyksli en í þessu tilviki taldi dómari að enginn kynferðislegur þáttur, eða lostugt athæfi, hefði verið til staðar.

Þó er að finna í lögreglusamþykktum margra sveitarfélaga ákvæði sem fela í sér bann við ósæmilegri háttsemi eða hegðun og getur nekt á almannafæri fallið þar undir. Tilvik sem þessi hafa reglulega komið upp á Íslandi er gjarnan lokið með tiltali lögreglu án frekari eftirmála.

Uppfært: 15:30 – Vísir greinir frá því að mennirnir tveir hafi verið að baða sig í Hólmsá þegar lögreglu barst fyrst ábending um málið. Þegar lögreglu bar að garði voru mennirnir komnir upp á veg og var nakta manninum var fylgt á bráðamóttökuna til að fá viðeigandi þjónustu.