Erlendir ferðamenn eiga það til að fara óþvegnir í almenningssundlaugar á Íslandi og starfsmenn sundlauganna bregðast ekki við. Eru margir orðnir frekar þreyttir á þessu enda eykur þetta á óþrifnaðinn í laugunum.

„Af hverju fá túristar að fara óþvegnir í sund?“ spyr ónefndur maður á samfélagsmiðlinum Reddit. Segist hann hafa mætt tveimur ferðamönnum, sveittum og sandblásnum. Þeir hafi farið beint í stuttbuxurnar og út í laug.

Þegar maðurinn benti ferðamönnunum á reglurnar, það er að skylda sé að baða sig áður en farið er út í laugina, svöruðu þeir aðeins: „Whatever dude.“ Einnig spurði hann sundlaugarvörðinn sem var frekar sama um þetta. „Er mannekla eða bara enginn að nenna að þrífa typpalingana?“ spyr hann.

Hætt að nenna

Það er eins og við manninn mælt að heilmiklar umræður hafa spunnist um þetta. Enda skipta sundlaugar landann máli. Nefnt er að sundlaugarvatnið sé að miklu leyti endurnýtt í lokuðu kerfi með síum og því mikilvægt að þrífa sig vel. Vandinn sé hvað verstur hjá bandarískum ferðamönnum.

„Þetta er óþolandi en það er allavega hægt að benda túristum á að fara í Sky Lagoon eða Blue Lagoon. Þar geta þeir borgað 18 þúsund á haus fyrir að baða sig í rassasafa hvors annars,“ segir einn verulega fúll sem bendir þó á að vandamálið sé ekki bundið við erlenda ferðamenn. Íslensk ungmenni baði sig heldur ekki áður en gengið er til lauga. „Sérstaklega koma heilu fótboltaliðin af æfingu í bæjarfélaginu sem ég bý í og fara beint ofan í laug án þess að þvo sér, sumir meira að segja á nærbuxunum. Viðbjóður,“ segir hann.

Sjá einnig:

Íbúar þreyttir á sóðaskap í Vatnaveröld í Reykjanesbæ – Margir gestir baði sig ekki og karlar fari í laugina á naríunum

Þá er nefnt að bæði starfsfólk og aðrir gestir séu einfaldlega hætt að nenna að segja erlendum ferðamönnum frá reglunum. Fjöldi ferðamanna hafi einnig aukist mikið. Einn segist frekar fara í sundlaugar í úthverfum, svo sem Breiðholtslaug og Álftaneslaug, til þess að komast hjá fjölda ferðamanna.

Konur þvo ekki á sér hárið

Ein kona nefnir að vandamálið sé tvíþætt. Annar vegar sé það mannekla í sundlaugunum. Það séu meiri líkur á að sjá hvítabjörn á Íslandi en starfsmanna í klefa sundlauga. Hins vegar að starfsmennirnir þori einfaldlega ekki að segja neitt við gesti sem baði sig ekki. Áður fyrr hafi sundlaugarverðir hótað að hringja á lögregluna ef fólk þvoði sér ekki frá toppi til táar. Vandamálið sé þó ekki eingöngu bundið við erlenda ferðamenn.

„Annars finnst okkur manninum mínum Íslendingar lítið skárri en túristarnir. 80 prósent kvenna þvo ekki á sér hárið áður en þær fara í sund,“ segir hún.