Fimm konur hafa sakað egypska auðjöfurinn Mohamed Al Fayed um að hafa nauðgað sér þegar þær störfuðu fyrir hann í Harrods-verslunarrisanum. Að auki hafa tuttugu aðrir kvenkyns starfsmenn sagt að Al Fayed hafi kynferðislega áreitt þær á vinnustaðnum.
Þetta kemur fram í heimildarmynd sem rannsóknarblaðamenn BBC hafa unnið að. Í myndinni er Al Fayed, sem lést í fyrra 94 ára aldri, líkt við þekkta kynferðisglæpamenn eins og Jeffrey Epstein, Jimmy Saville og Harvey Weinstein af lögmönnum kvennanna.
Al-Fayed var gríðarlega þekktur viðskiptamaður í Bretlandi en auk Harrods-verslunarinnar heimsfrægu átti hann um tíma knattspyrnufélagið Fulham. Elsti sonur hans, Dodi Al-Fayed, var ástmaður Díönu prinsessu af Wales og lést ásamt henni í bílslysinu í París þann 31. ágúst 1997.
Andrúmsloftið í Harrods-lúxusbúðinni í Knightsbride-hverfinu í London er sagt hafa verið eitrað og Al-Fayed er sagður hafa herjað á kvenkyns starfsfólk verslunnar til að upplifa kynlífsóra sína. Hann hafi síðan ásamt yfirmönnum Harrods sópað málunum undir teppið. Ef konur kvörtuðu undan AlFayed var þeim umsvifalaust hótað og þær hræddar til hlýðni.
„Þetta er eitt versta dæmið um kynferðisleg misnotkun sem ég hef séð og mögulega heimurinn allur,“ sagði lögmaðurinn Bruce Drummond á blaðamannafundi þegar myndin var kynnt. Þar sagði hann að misnotkunin hefði haft gríðarleg áhrif á þær konur sem störfuðu hjá Harrods og lentu í klóm hins meinta skrímsli.
Ein kona sem steig nafnlaust fram sagði að það hefði verið eins og að stíga inn í ljónagryfju að ráða sig til starfa hjá Harrods. Al-Fayed hefði þegar runnið á lyktina og hann hafi sérstaklega níðst á þeim sem veikasta voru fyrir. Þær sem að máttu ekki missa úr launagreiðslu til þess að borga fyrir leigu og þær sem að höfðu ekki sterkt bakland.
Hann hafi skapað sér einskonar föðurímynd innan fyrirtækisins og viljað að starfsfólkið kallaði sig pabba. Það hafi hins vegar verið yfirvarp til þess að skapa traust og síðan hafi hann sætt færis bak við tjöldin til að brjóta á konunum.
Krafa kvennanna sem lentu í klóm Al-Fayed er sú að yfirmenn Harrods gangist við ábyrgð sinni í málinu, biðjist afsökunnar og bæti fyrir misgjörðir hins látna auðkýfings.
