Rússnesk stjórnvöld, með Vladimir Pútín í broddi fylkingar, hvetja nú landsmenn sína til þess að drífa sig heim í hádeginu og stunda kynlíf. Tilgangurinn er ekki ánægjuleg afþreying heldur bregðast við lækkandi fæðingartíðni í Rússlandi eins og mörgum öðrum ríkjum. Framtakið hefur verið kallað „Kynlíf í vinnunni“ og er hluti af víðtækari aðgerðum til þess að bregðast við vandamálinu. Að meðaltali eignast hver kona í Rússlandi 1,5 börn sem er undir þeim fjölda sem þarf til að viðhalda mannfjölda landsins, sem er 2,1 börn á konu.
Þá hefur stríðsbrölt Rússa í Úkraínu aukið vandann mjög enda fjölmargir álitlegir feður fallið í valinn. Þá er talið um ein milljón ungra Rússa hafi flúið landið til þess að forðast það að enda á vígvellinum. Hefur Pútín lýst því yfir að það að auka fæðingartíðnina sé eitt mikilvægasta verkefni þjóðarinnar
„Framtíð Rússlands veltur á því hversu mörg við verðum,“ sagði Pútín á dögunum. Þá lét heilbrigðsráðherra Rússlands, Dr. Yevgeny Shestopalov, hafa eftir sér að það að hafa mikið að gera í vinnunni væri ekki nein afsökun fyrir því að eignast ekki fjölda barna.
Rússar eru ekki eina þjóðin sem glímir við þetta vandamál. Stjórnvöld í Singapore gáfu út rapplag sem ætlað var að auka áhuga landsmanna á að fjölga sér. Ítalir hafa síðan gefið það út að 22. september næstkomandi verði „frjósemisdagurinn“ haldinn hátíðlegur. Hvort að þegar sé búið að ákveða að 22. júní verði fæðingardagurinn haldinn hátíðlegur skal ósagt látið.