Köttur lenti í sjálfheldu í glugga á efstu hæð fjölbýlishúss í Grafarholti klukkutímum saman í dag. Eigandi kattarins hafði verið borinn út úr félagslegri íbúð og skildi hann fimm ketti eftir í íbúðinni.

Starfsfólk Félagsbústaða sem var að tæma íbúðina eftir að leigjandi hafði verið borinn út mætti fimm köttum í íbúðinni, þremur fullorðnum og tveimur kettlingum. Þegar hurðin var opnuð var svo mikil hræðsla að ein læðan náði að komast út á svalir og þaðan í gluggann.

Það var nágranni, Kolbrún Dögg Arnardóttir, sem tók eftir að læðan væri í sjálfheldu í glugganum í hádeginu í dag og við kettinum blasti hátt fall, nokkrar hæðir niður.

Mættu með net

Hringt var í slökkvilið sem kom á staðinn en gat ekki sett upp stiga til að sækja köttinn. Brekkan undir glugganum var of aflíðandi til þess. Mælti slökkviliðið með því að haft yrði samband við Félagsbústaði til að opna íbúðina og reyna að komast að kettinum frá glugganum.

Kolbrún hringdi þrisvar sinnum í Félagsbústaði en segir að það hafi tekið þá meira en klukkutíma að mæta með lykilinn. Það var of seint. En sem betur fer var búið að hafa samband við dýrabjörgunarsamtökin Dýrfinnu áður og konur frá þeim voru mættar á svæðið. En þær eru þaulreyndar í að bjarga dýrum úr aðstæðum sem þessum.

„Þetta endaði með því að kötturinn féll niður en við vorum búin að strengja net undir hann. Svo þurftum við að hlaupa á eftir kettinum út um allt hverfi,“ segir Kolbrún sem aðstoðaði konurnar frá Dýrfinnu við björgunina. „Þær eru núna á leiðinni í aðhlynningu. Þær eru vel bitnar og klóraðar. Kisa var alveg tryllingshrædd.“

„Ekki í boði“

Klukkan var langt gengin í þrjú þegar það tókst að ná kettinum í búr. Var þá farið með alla kettina niður í Kattholt.

Kolbrún segir að Dýrfinna eigi skilið bestu þakkir fyrir björgunina. En hún harmar að kettirnir hafi verið skildir eftir innilokaðir í íbúðinni.

„Við viljum minna fólk á að þó það sé á leiðinni á götuna að hafa þá samband við viðeigandi samtök eða einhvern sem getur komið dýrunum í skjól,“ segir Kolbrún. „Þetta er ekki í boði. Það var ekkert vitað hvenær starfsfólk félagsbústaða hefði mætt, núna eða eftir viku. Hann skildi þá eftir í lokaðri íbúð. Það er alls ekki ásættanlegt þó svo að þú sért í vandræðum.“