Ef frá er talið eitt hverfi á Akureyri þá er Hveragerði sá staður á landsbyggðinni þar sem fasteignaverð er hæst. Hvergi hefur fasteignaverð þó hækkað meira en í Bolungarvík.
Þetta má sjá í vefsjá matssvæða hjá Húsnæðis og mannvirkjastofnun. Það er byggt á fasteignamati. DV skoðaði hvaða svæði á landsbyggðinni eru þau dýrustu og ódýrustu og hvar breytingarnar hafa verið mestar á milli ára. Hin óformlega rannsókn byggir á fermetraverði fjölbýlishúsnæðis.
Algengast er að fermetraverðið sé hæst í stærri þéttbýliskjörnum, einkum þeim sem eru í um klukkutíma radíus frá höfuðborgarsvæðinu. Verðið er lægra í smærri þorpum, einkum þeim sem eru í mikilli fjarlægð frá höfuðborgarsvæðinu, svo sem á Austfjörðum og Vestfjörðum. Sveiflurnar eru hins vegar miklar og munurinn talsverður, jafn vel innan sömu svæða.
Hæsta fermetraverðið utan höfuðborgarsvæðinu er í Hveragerði, 609 þúsund krónur. Það er hærra en í sumum hverfum á höfuðborgarsvæðinu og eina svæðið á landsbyggðinni þar sem verðið fer yfir 600 þúsund ef frá er talið eitt hverfi á Akureyri.
Almennt séð er fasteignaverð nokkuð hátt á Suðurlandi en í öðru sæti í landshlutanum er Selfoss, fjölmennasti bærinn. Þar er fermetraverðið 576 þúsund.
Það bæjarfélag sem er hins vegar í hvað örustum vexti, hvað fasteignaverð varðar, er hins vegar Þorlákshöfn. Fermetraverðið þar er nú 514 þúsund og hefur hækkað um 16,4 prósent á milli ára. Í Hveragerði og á Selfossi eru hækkanirnar „aðeins“ 6,8 og 5,9 prósent. Hafa ber þó í huga að þetta eru allt saman myndarlegar hækkanir miðað við höfuðborgarsvæðið.
Annar staður sem hefur vaxið mjög hratt er Vík í Mýrdal. Þar er verðið langtum lægra en í Árnessýslunni, 355 þúsund, en hækkunin er 14,7 prósent á milli ára í þessu mikla ferðamennskuþorpi. Einnig hefur vöxturinn verið mikill í Vestmannaeyjum, 9,7 prósent, og er verðið nú 414 þúsund.
Af öðrum stöðum á Suðurlandi má nefna Laugarvatn (449), Flúðir (274), Hellu (272), Hvolsvöll (353), Kirkjubæjarklaustur (268) og Höfn í Hornafirði (436). Lægsta verðið á Suðurlandi er að finna á Stokkseyri, aðeins 158 þúsund krónur og þar er líka vöxturinn lægstur, aðeins 0,4 prósent.
Líkt og á Suðurlandi er fasteignaverð hátt á Suðurnesjum. Hæsta fermetraverðið má finna í Vogum í Vatnsleysuströnd, 560 þúsund, sem er jafn framt næst höfuðborgarsvæðinu.
Í Reykjanesbæ er verðið hærra í Njarðvík (554) en í Keflavík (528) en allra lægst er það þó á Ásbrú (445).
Þrátt fyrir að hafa gengið í gegnum miklar hremmingar er fasteignaverð enn þá 471 þúsund í Grindavík. Ekki nóg með það þá hækkaði verðið um 3,1 prósent á milli ára.
Mestu hækkanirnar eru hins vegar í smæstu þorpunum. Í Garðinum (365) er hækkunin 14,6 prósent og 10,1 prósent í Sandgerði (374).
Atvinnulífið á Akranesi hefur mátt þola hvert áfallið á fætur öðru á undanförnum árum. Það virðist þó ekki endurspeglast í fasteignaverðinu því það hefur hækkað um 7,2 prósent á milli ára. Fermeterinn kostar þar nú 551 þúsund krónur og er sá sjötti dýrasti á landsbyggðinni.
Langmestu hækkunina á Vesturlandi má hins vegar finna á Stykkishólmi (357), heil 20,9 prósent í hinu fallega þorpi við Breiðafjörð.
Einnig má sjá myndarlegar hækkanir á Borgarnesi (436), Grundarfirði (290) og Ólafsvík (196), allt í kringum 10 prósentin. En langtum minni í smærri þéttbýliskjörnum og meira að segja rúmlega eins prósents rénun á Hvanneyri (327) þar sem Landbúnaðarháskólinn er til húsa.
Hækkanirnar hafa þó verið mestar á Vestfjörðum og er það einkum rakið til uppgangs í atvinnulífinu vegna sjókvíaeldis.
Hvergi á landinu hefur fasteignaverð hækkað meira en á Bolungarvík (210), um heil 32,1 prósent. Þetta er ekki í fyrsta sinn sem hækkunin er mest á Bolungarvík, bæjarfélags sem hefur barist við að koma íbúafjöldanum yfir 1000 þúsund manns um langt skeið.
Vitaskuld er verðið á Vestfjörðum þó hæst á Ísafirði. Í eldri byggðinni er það 403 þúsund krónur en 307 í yngri byggðinni og 182 í Hnífsdal.
Fyrir utan Súðavík (140) þar sem verðið lækkaði hafa sést tveggja stafa prósentuhækkanir á flestum stöðum á Vestfjörðum. Svo sem Patreksfirði (291), Tálknafirði (146), Þingeyri (133), Bíldudal (128) og Flateyri (127). Hafa ber þó í huga að þó hækkanirnar séu miklar þá er verðið enn þá eitthvað það lægsta á landinu.
Akureyri er langfjölmennasti bærinn á Norðurlandi og vilja margir í raun kalla staðinn borg. Fasteignaverð er þar mjög misjafnt eftir hverfum. Dýrasti hluti bæjarins er Naustahverfið (622), syðst í bænum og vestan við flugvöllinn. Þá kemur Giljahverfi (577), Efri Brekka (526), Neðri Brekka, Eyrin og innbærinn (511) en Glerárhverfið nyrst í bænum er ódýrast (494).
Vekur hins vegar nokkra eftirtekt að í hinum þremur síðastnefndu hverfum hefur fasteignaverðið lækkað á milli ára, frá 0,3 upp í 0,6 prósentustigum. Almennt er lítil hækkun fasteignaverðs á Akureyri, mest 4,6 prósent í Giljahverfinu.
Á eftir Akureyri koma helstu þéttbýlisstaðir á Norðurlandi, Sauðárkrókur (370), Húsavík (354), Dalvík (316), Siglufjörður (230), Hvammstangi (227), Hofsós (210) og Blönduós (178). Eru hækkanirnar sérstaklega myndarlegar á Norðvesturlandi, allar í tveggja stafa prósentutölum og heil 26,1 prósent á Skagaströnd (143).
Lægsta húsnæðisverð landsins er í Norður Þingeyjarsýslu. Á Raufarhöfn er það aðeins 54 þúsund krónur fermeterinn og hefur lækkað um 1,7 prósent á milli ára.
Að lokum komum við að Austurlandi þar sem verðið er hæst á Egilsstöðum (432) en hækkunin þar er þó aðeins 1,7 prósent á milli ára.
Mestu hækkanirnar, allt að 18,2 prósentum má finna í bæjum á Austfjörðum eins og Reyðarfirði (343), Seyðisfirði (239), Fáskrúðsfirði (225) og Breiðdalsvík (121).
Aðeins á Djúpavogi (161) hefur verið lækkun fasteignaverðs og það aðeins um 0,1 prósent.
Af öðrum stöðum má nefna Neskaupstað (312), Eskifjörð (217), Vopnafjörð (150) og Bakkagerði, betur þekkt sem Borgarfjörð eystri (110).
