Í skugga banaslyss í íshellaskoðun í Breiðamerkurjökli og fordæmalauss klúður varðandi utanumhald um fjölda viðskiptavina í umræddri ferð hafa forsvarsmenn ferðaþjónustufyrirtækisins Ice Pic Journeys fjarlægt allar upplýsingar um sig af heimasíðu fyrirtækisins. Þá hafa ítarlegir skilmálar, sem ferðalangar þurfa að skrifa undir fyrir ferðir á vegum fyrirtækisins, vakið athygli en þeir ganga nokkuð lengra en skilmálar annarra sambærilegra fyrirtækja. Þannig segist fyrirtækið bera enga ábyrgð á slysum, eða jafnvel dauða, viðskiptavina sinna.
Segja má að landsmenn hafi fylgst agndofa með fréttum af slysi í íshellaskoðunarferð í Breiðamerkurjökli um helgina og umfangsmikilli leit sem hófst í kjölfarið. Nokkru eftir fyrstu fréttir var greint frá því að einn ferðamaður væri látinn og annar slasaður illa en síðar kom í ljós að um bandarískt par væri að ræða. Þá stóð yfir afar flókin aðgerð á jöklinum þar sem 200 manns, er mest var, freistuðu þess að finna tvo aðra ferðamenn sem saknað var af 25 manna hópi. Leitin stóð yfir í rúman sólarhring en svo kom í ljós að illa hafði verið haldið utan um skráningu í ferðina og aðeins hefðu 23 einstaklingar mætt í túrinn. Leitin hafði því staðið yfir að fólki sem ekki var til.
Bandaríkjamennirnir Mike Reid og Ryan Newburn eru stofnendur fyrirtækisins. Þeir eru þaulreyndir í ferðabransanum og jöklaleiðsögn en þeir eru í raun frumkvöðlar í því að bjóða upp á íshellaferðir allan ársins hring í Vatnajökulsþjóðgarði. Í gær gátu netverjar kynnt sér sögu fyrirtækisins og upplýsingar um eigendur þess í nokkuð löngu og ítarlegu máli en þær upplýsingar hafa nú verið fjarlægðar af vefsíðu fyrirtækisins.
Þar má þó enn finna dæmi um yfirlýsingu sem allir viðskiptavinir fyrirtækisins þurfa að skrifa undir áður en lagt er af stað á jökulinn. Hafa skilmálarnir vakið nokkra athygli en þar kemur fram að fyrirtækið beri enga ábyrgð ef að slys, eða jafnvel dauðsfall, eigi sér stað.
Á vefsafn.is má þó enn finna allar upplýsingar um stofnendur og eigendur Ice Pic Journeys.
View this post on Instagram
Það gildi um öll tilvik, líka þegar að starfsmenn fyrirtækisins valda í raun slysinu. Til samanburðar eru þau samkeppnisfyrirtæki sem DV skoðaði með ákvæði um að þau beri ekki ábyrgð ef að ferðalangarnir sjálfir bera ábyrgð á slysinu með einhvers konar gáleysi eða vítaverðri hegðun en ef starfsmenn þess valdi slysum beri þau ábyrgð í samræmi við íslensk lög. Í umfjöllun Vísis um ábyrgðaskilmálana var haft eftir sérfræðingi að ólíklegt væri að áðurnefnd ábyrgðaryfirlýsing Ice Pics Journeys myndi halda fyrir dómi. „Almennt get ég sagt að ef sök er sönnuð þá firra almennir ábyrgðarleysisfyrirvarar menn ekki ábyrgð,“ var haft eftir Óðni Elíassyni, hæstaréttarlögmanni í áðurnefndri umfjöllun.
