Þrjú 16 ára ungmenni, tvær stúlkur og piltur, urðu fyrir alvarlegri stunguárás á Menningarnótt,. Meintur gerandi, piltur sem einnig er 16 ára, var í gærkvöldi úrskurðaður í gæsluvarðhald til til 30. ágúst á grundvelli rannsóknarhagsmuna að kröfu Lögreglunnar á höfuðborgarsvæðinu. Pilturinn er vistaður á Hólmsheiði í viðeigandi úrræði sökum ungs aldurs.

Ungmennin þrjú voru ásamt fjórða ungmenninu í bifreið við Skúlagötu 4 í miðborginni þegar meintur gerandi, veittist að þeim. Stúlkan sem særðist mest í árásinni er enn í lífshættu, en hin tvö hlutu minni áverka, voru aldrei í lífshættu og eru á batavegi. Hin stúlkan hefur verið útskrifuð af spítala.

Í fyrstu var greint frá því að öll ungmennin væru íslenskir ríkisborgarar, en pilturinn sem særðist í árásinni er frá Palestínu. Flúði hann hingað til lands frá Gaza fyrir þremur árum.

Rætt var við Salym Albyouk, föður drengsins, í kvöldfréttum Stöðvar 2 í kvöld. 

„Ég hélt að þetta land væri friðsamasta land í heimi og ég væri að bjarga lífi barnanna minna með því að flytja hingað frá Gasa. Eftir árásina finnst mér við ekki lengur örugg. Ég mun þurfa að fylgjast með hverju skrefi sonar míns því ég óttast um líf hans.“

Salym er gagnrýninn á fyrstu upplýsingar lögreglu eftir árásina, en honum var tilkynnt að sonur hans væri látinn. „Ég varð frávita af sorg á spítalanum. Læknarnir komu svo og sögðu mér að hann væri í aðgerð.“ Einnig er hann ósáttur við lögregla hafi í fyrstu gefið þær upplýsingar að brotaþolar væru allir íslenskir ríkisborgarar.

Sonur hans liggur á barnadeild Hringsins en hann var stunginn nokkrum sinnum og er með skurðsár í handarkrika, við brjóst og á hönd. 

Salym gaf syninum leyfi til að fara á Menningarnótt ásamt vinum sínum og segir hann hafa hlakkað mikið til, og foreldrar hans gefið honum ný föt og rakspíra.

Ungmennin voru á heimleið í bíl frá miðbænum ásamt palestínskum vini sem ók bílnum þegar árásin hófst.

„Þau sátu öll inn í bílnum þegar annar strákur kom hlaupandi að og braut rúðu í honum. Eftir það byrjaði hann að stinga þau og stakk svo af.“ 

Að svo stöddu er ekki horft til þess að ásetningur árásarinnar varði hatursglæp.

Horfa má á viðtalið við Salym í heild sinni á Vísi.