Óhugnanleg hnífaárás átti sér stað í miðborginni á Menningarnótt þar sem 16 ára piltur stakk þrjú ungmenni með hnífi. Pilturinn var í gær úrskurðaður í gæsluvarðhald til 30. ágúst næstkomandi, en ungmennin sem urðu fyrir árásinni voru öll flutt á slysadeild og er eitt þeirra í lífshættu.
Í viðtalinu kom Margrét inn á könnun sem hún stóð fyrir ásamt fleirum meðal ungmenna á aldrinum 13 til 16 ára. Í könnuninni var vopnaburður ungs fólks skoðaður og þegar þau voru spurð hvers vegna þau bæru vopn var algengasta ástæðan sjálfsvörn. Segir Margrét að fæst hafi ætlað að nota vopnið til að ráðast á einhvern.
Í viðtalinu var bent á að ungi maðurinn í árásinni á Menningarnótt sé undir lögaldri en þó sakhæfur. Það flæki málið en mikilvægt sé að finna viðeigandi úrræði.
„Það er ekki við hæfi og mun væntanlega ekki bera árangur að nota réttarvörslukerfið til að kljást við svona mjög unga gerendur en það þarf einhvern veginn að bregðast við,“ sagði Margrét sem tók fram að refsing gæti borið árangur en það megi ekki vera refsing sem við hugsum um fyrir fullorðinn einstakling eins og fangelsi.
„Það eru mjög fáir sem koma betri út úr fangelsum heldur en áður en þeir fóru þangað inn, þegar við erum að tala um svona unga aðila,“ sagði hún og bætti við að almennt væru fangelsi slæmur staður til að betra unga gerendur. Aðspurð hvaða úrræði væri þá hægt að grípa til sagði hún:
„Það er ákveðið módel sem er stundum talað um sem uppbyggilega réttvísi þar sem sest er niður með ungum gerendum og þeim er gert skýrt hvaða afleiðingar brotið þeirra hafði og þeir fá jafnvel að heyra í þolendum þeirra lýsa afleiðingunum. Þeir þurfa að taka ábyrgð og þá er þeim komið inn í úrræði og reynt að passa að ungmennin tengist nýjum hópum, jákvæðum félagsskap og fyrirmyndum.“