Fjórir eintaklingar urðu undir ísfargi þegar íshellir hrundi í Breiðamerkurjökli fyrr í dag. Viðbragðsaðilum tókst að ná tveimur úr ísnum, sem eru alvarlega slasaðir, en tveir eru enn fastir og er nú unnið hörðu höndum að því að ná þeim út.
Þetta kemur fram í færslu á Facebook-síðu Lögreglunnar á Suðurlandi en þar kemur fram að ekki sé vitað um ástand þeirra sem enn eru fastir í ísnum.
Viðbragðsaðilar á Suðurlandi fengu útkall áskömmu fyrir kl 15 í dag um hrun í íshelli í Breiðamerkurjökli. 25 manna hópur var í skipulagðri ferð um svæðið með fararstjórn. Fjórir aðilar urðu fyrir ísfargi, nú þegar hefur tveimur aðilum verið náð undan ísnum og eru þeir alvarlega slasaðir. Enn er verið að leita að tveimur aðilum sem eru fastir í íshellinum. Aðrir sem voru í hópnum eru óslasaðir og verið að koma þeim í fjöldahjálparstöð. Unnið er að björgunarstörfum á vettvangi. Ekki er vitað um frekara ástand á fólki á þessari stundu.
