Myndlistarmaðurinn Tolli Morthens segir frá óvenjulegu atviki í Morgunblaðinu í dag sem henti hann á dögunum þegar hann var á ferð um Landmannaleið ásamt ljósmyndaranum Árna Sæberg.

Tolli undirbýr nú sýningu sem sækir efnivið í Kerlingarfjöll og Landmannalaugar og ákváðu hann og Árni að fara í ferð þar sem hann hugðist mála eina mynd til viðbótar.

Fóru þeir upp á hrygginn fyrir ofan Frostastaðavatn og málaði Tolli fallega mynd sem sjá má á síðum Morgunblaðsins í dag.

Þegar kom að því að halda heim á leið var myndin sett aftan í bílinn sem hristist töluvert þegar ekið var á malarveginum yfir Landmannaleið.

Eftir nokkra keyrslu ákvað Árni, sem er einn færasti ljósmyndari landsins, að stoppa til að taka mynd en þá tók hann eftir því að myndin var horfin. „Þetta er ekki gott,“ segir Tolli að Árni hafi sagt en hlerinn á bílnum hafði opnast á leiðinni og myndin fokið út.

„Eft­ir það flögraði hún vænt­an­lega yfir há­lend­inu og hef­ur ef­laust fundið stað sem við vit­um ekki hvar er,“ segir Tolli í Morgunblaðinu um þetta óvenjulega atvik.

„Á einu augna­bliki breytt­ist verkið yfir í hug­myndal­ist um for­gengi­leik­ann, hvernig allt breyt­ist og ekk­ert er á hönd fest. Ég var því fljót­ur að sætta mig við þetta. Svona er þetta bara. Við ráðum engu,“ bætir hann við.