Í gær var þingfest mál fyrir Héraðsdómi Reykjavíkur sem varðar kynferðisbrot í bíl í Kópavogi. Þinghald í málinu er lokað þar sem það er mjög viðkvæmt.
Meint brot átti sér stað mánudaginn 18. júlí árið 2022. Maður er sakaður um að hafa brotið gegn konu í bíl sem lagt var á óþekktum stað í Kópavogi. Er hann ákærður fyrir nauðgun og brot gegn kynferðislegri friðhelgi með því að hafa haft samræði við konuna án hennar samþykkis, þar sem hún lá sofandi eða meðvitundarlítil í aftursæti bílsins, og þannig notfært sér að hún gat ekki spornað við verknaðinum vegna vímuáhrifa og svefndrunga.
Maðurinn er einnig sakaður um að hafa tekið brotið upp og útbúið myndskeið af samræðinu.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Fyrir hönd brotaþola er gerð krafa um greiðslu skaðabóta upp á 3,5 milljónir króna.
Búast má við að réttað verði í málinu og dómur kveðinn upp í haust.