Tuttugu og eins árs gamall maður hefur verið handtekinn á Tenerife eftr fjölda brota gegn ferðamönnum á eyjunni. Brotin voru framin á Adeje-ströndinni en maðurinn var handtekinn á Amerísku ströndinni. Canarian Weekly greinir frá.
Maðurinn er grunaður um sex innbrot og tvö fjársvikabrot. Hann er sagður hafa klifrað yfir veggi sem umlykja hótelíbúðir í Adeje og komist inn í íbúðir í gegnum opnar svaladyr á meðan hótelgestir voru sofandi.
Er hann sagður hafa rænt miklu af verðmætum, snjallsímum, þráðlausum heyrnartólum, spjaldtölvum, reiðufé og greiðslukortum. Hann sveik síðan út vörur í verslunum með greiðslukortunum.
Hann var síðan, sem fyrr segir, handtekinn á Amerísku ströndinni, en þá hafði lögreglan komist að þeirri niðurstöðu að öll sex innbrotin hefðu verið framin af sama manninum sem ávallt beitti sömu aðferðinni.
Búast má við því að maðurinn verið ákærður fljótlega og málið fari fyrir dóm.
Ljóst er að ferðamenn þurfa að vera á varðbergi fyrir þjófum á Tenerife eins og á mörgum öðrum ferðamannastöðum. Fjölmargir Íslendingar sækja eyjuna fögru heim allt árið um kring.