Kona að nafni Þórey Pálsdóttir hefur verið sýknuð af kröfum Sellfossveitna vegna heitavatnsreikninga sem hún neitaði að borga að fullu. Taldi hún að heita vatnið væri of kalt og því væri um gallaða vöru að ræða. Greiddi hún aðeins 15 þúsund krónur á mánuði þegar reikningurinn var tvöfalt hærri.
Dómurinn féll í Héraðsdómi Suðurlands þann 24. júlí síðastliðinn en hefur nú verið birtur á vefsíðu héraðsdómstólanna.
Selfossveitur, sem eru í eigu sveitarfélagsins Árborgar, kröfðust rúmlega 445 þúsund króna auk vaxta frá árinu 2019 vegna ógreiddra heitavatnsreikninga en Þórey krafðist sýknu og málskostnaðar.
Forsaga málsins er sú að Þórey og eiginmaður hennar fluttu í hús við Norðurbraut í hverfinu Tjarnarbyggð í Kaldaðarnesi, títt nefnt Búgarðabyggð, árið 2007. Voru þau frumbýlingar í því hverfi, sem er um 4 kílómetrum austrar en Selfoss.
Fyrstu sjö eða átta árin var heitavatnskostnaður áætlaður út frá kostnaði við sams konar hús á Selfossi. Var þetta gert vegna þess að hverfið var nýtt og erfiðlega gekk að tryggja nægan hita á vatninu. Uppbygging hverfisins gekk hægt, meðal annars vegna bankahrunsins. Voru heitavatnsreikningar hjónanna greiddir skilvísilega á meðan kostnaðurinn var áætlaður.
Í bréfi framkvæmdastjóra Selfossveitna frá árinu 2006 kemur fram að gert sé ráð fyrir 63 gráðu hita í hverfinu en á meðan uppbyggingu stendur lægri. „Selfossveitur munu tryggja nægan inntakshita fyrir húshitunarkerfi sem hönnuð eru fyrir 55°C, á meðan uppbyggingartíma Tjarnarbyggðar stendur,“ segir í bréfinu.
Spólum fram til ársbyrjunar 2016 þegar Selfossveitur tilkynntu Þóreyju að breytingar yrðu gerðar á notkunargjöldum hitaveitunnar. Það er að tekin yrði upp rúmmálsmælingar, áætlaðar út frá álestri undanfarinna ára. Þessi breyting myndi taka gildi um sumarið.
Þórey mótmælti þessu strax enda þýddi breytingin tvöföldun á heitavatnsreikningnum. Sagði hún inntakshita vatnsins aðeins vera um 40 gráður og farið mun neðar nema umtalsvert vatn væri látið renna í gegnum gólfhitakerfið. Húsið stæði í botnlanga og langt væri í næstu hús. Ef Selfossveitur gætu ekki aflað heitara vatni þá yrði áfram að miða við fyrri áætlun.
Fóru nú fram miklar bréfaskriftir á milli hjónanna og Selfossveitna. Nefndu þau að Selfossveitur hefðu skuldbundið sig til að afhenda 55 gráðu heitt vatn. Ekki væri forsvaranlegt að rukka fyrir rúmmál. Selfossveitur töldu sig hins vegar ekki hafa lofað 55 gráðu heitu vatni, það hefðu einungis verið hönnunarviðmið.
Kom pípari frá Selfossveitum til að mæla hitann og sagði eiginmaður Þóreyjar hann hafa staðfest að hitinn væri talsvert undir 51 gráðu. Seinna voru gerðar síritamælingar sem sýndu mjög rokkandi hitastig.
Í ársbyrjun 2017 var Þóreyju tjáð að breytingar yrðu gerðar á afhendingu heits vatns á köldum stöðum í hverfinu. Það er að komið yrði fyrir hemli og notendur gætu keypt fyrir fram ákveðinn fjölda lítra. Með slíkri útfærslu væri hægt að halda hita á vatninu. Rúmmálsrukkunin gilti hins vegar áfram.
Slíkur hemill var hins vegar ekki settur upp í heimilið að Norðurbraut þar sem ágreiningur var um hversu margir lítrar skyldu vera á honum.
Þegar ljóst var að ágreiningurinn var óbrúanlegur ákváðu Þórey og maður hennar að greiða mánaðarlega 15 þúsund krónur, sem væri eðlilegur upphitunarkostnaður sambærilegrar fasteignar á þjónustusvæði Selfossveitna. Í eitt skipti 75 þúsund krónur þó. Selfossveitur héldu hins vegar áfram að gefa út tvöfalt hærri reikninga.
Svona gekk þetta í nokkur ár þar til hjónin seldu fasteignina í ársbyrjun 2020. Þremur árum eftir það, í apríl árið 2023, barst Þóreyju hins vegar innheimtuaðvörun og innheimtubréf vegna ógreiddra heitavatnsreikinga. Var mál svo höfðað gegn henni í júní það ár.
Dómari féllst ekki á þau sjónarmið að Selfossveitur hefðu lofað að tryggja 55 gráðu inntakshita í hverfinu heldur að það hefði verið viðmið. Þá hafi samkvæmt síritamælingu, sem lögð var fram, mælst á bilinu 46,6 til 57,8 gráðu inntakshiti í húsinu, með meðalhita 52 gráður þegar veður var kalt. Taldi dómari því ekki að vatnið væri gölluð vara eins og Þórey hélt fram.
Hins vegar taldi dómari að Selfossveitur hefðu sýnt af sér tómlæti við innheimtu í málinu. Frá árinu 2018 til 2023, eða í fimm ár hafi engin samskipti verið á milli hjónanna og Selfossveitna utan sjálfvirkra reikninga. Tekið var við greiðslum til ársins 2020 en Þóreyju ekki gerð grein fyrir skuldastöðu sinni.
Eins og áður segir sýknaði dómari Þóreyju af kröfum Selfossveitna í málinu. Þá var Selfossveitum gert að greiða henni 800 þúsund krónur í málskostnað.
