Þetta segir Kamma Thordarson, alþjóðastjórnmálafræðingur og varamaður í stjórn Viðreisnar, í aðsendri grein sem birtist á vef Vísis í morgun.
Þar greinir hún frá miður skemmtilegum skilaboðum sem hún fékk frá vini sínum í gær þegar hún var á mikilvægum fundi. Taldi Kamma að hann væri að reyna að finna tíma fyrir stelpurnar þeirra til að gista saman en annað kom á daginn. „Vildi bara láta þig vita að lögreglan kemur á morgun og fer með okkur til Kólumbíu,“ stóð í skilaboðunum.
„Ein besta vinkona dóttur minnar þarf að yfirgefa landið í dag. Estefania er yndisleg og hæfileikarík stelpa sem hefur búið á Íslandi í þrjú ár. Hún ætti að hefja sjöunda bekk nú í haust. Á meðan vinkonur hennar velja sér skólatöskur mun Estefania yfirgefa landið og fara til Kólumbíu, lands sem foreldrar hennar flúðu í von um að ala barnið sitt upp við öryggi.“
Kamma segir að enginn skilji óréttlæti heimsins betur en sá sem hefur reynt að útskýra útlendingalög fyrir börnunum sínum.
„Af hverju má hún ekki búa hérna?“ spyrja þau og svarið er: „Því hún fæddist í Kólumbíu, og stjórnvöld vilja ekki leyfa fólki þaðan að búa hér.“ „Ha? Hvers vegna?“ spyrja þau aftur og aftur, undrandi yfir óréttlætinu sem er óskiljanlegt.“
Kamma segir að þessar spurningar ættu að vera sjálfsagðar og hollar fyrir umræðuna en því miður gleymist þær oft.
„Við gætum leyft henni að búa hér áfram. Við gætum leyft henni að byrja í sjöunda bekk, eins og hana dreymir um, en í staðinn látum við hana yfirgefa allt sem hún þekkir. Eftir þrjú ár á Íslandi! Þrjú ár í skóla með jafnöldrum sínum og vinum. Þetta ætti aldrei að gerast.“
Kamma segir að margir varpi því fram að ekki sé hægt að leyfa öllum að vera hér og mögulega sé það rétt. Bendir hún á að í þessu tilfelli séu foreldrarnir báðir fullfærir starfskraftar sem vinna á Íslandi.
„Þau eru á leigumarkaði og borga sína leigu með tekjum frá störfum sem þau vinna löglega. Þau eru á engan hátt á framfæri ríkisins. Adrian, faðir Estefaniu, er eðlisverkfræðingur – eða erlendur sérfræðingur. Hann starfar hjá íslensku nýsköpunarfyrirtæki á Reykjanesi. Ísland hefur markvisst unnið að því að laða slíka sérfræðinga til landsins. Við höfum sett á fót markaðsverkefni til þess og veitt þeim skattaafslætti svo þeir komi og þekking þeirra nýtist samfélaginu okkar. Hvers vegna vísum við þessum frá,“ spyr hún.
Kamma segir að þetta sé ekki í fyrsta sinn sem fjölskyldan hefur fengið þessar fréttir. Segir hún að henni hafi verið synjað um landvistarleyfi fyrir nokkru síðan en lögreglan mætti ekki á tilsettum tíma og fengu þau að vera lengur.
„Þau munu sækja um ríkisborgararétt til Alþingis í haust. Gefum þeim frið þangað til þau fá svar. Leyfum þeim að njóta vafans eftir þrjú ár hér á landi. Þau lifa hér góðu lífi, borga skatta og gleðja fólk með nærveru sinni.“
