Þýska frumkvöðlafyrirtækið Tomorrow Bio býður upp á þá athyglisverðu þjónustu að djúpfrysta líkama fólks eftir andlátið og koma honum fyrir í geymslu. Tilgangurinn er sá að mögulega í framtíðinni komi fram ný tækni sem geri það að verkum að hægt verði að afþýða líkamanna og endurlífga viðskiptavini. Fyrir þá sem eru enn bjartsýnari og vilja spara sér aurinn þá er einnig boðið upp á að frysta aðeins heila fólks.
Daily Mail fjallaði fyrr í dag um þetta óvenjulega fyrirtæki en forsvarsmenn þess segja að starfsemin sé þegar hafin og yfir 650 einstaklingar hafi skráð sig á biðlista þess og borga fyrir það 50 evrur á mánuði. Ennfremur fullyrðir fyrirtækið að sex einstaklingar hafi þegar verið frystir með þessum hætti og þá hafi fimm gæludýr einnig verið fryst.
Fyrirtækið er með starfsstöðvar í Berlín, Amsterdam og Zurich en langtímageymsla fyrirtækisins er í Sviss.
Eins og gefur að skilja er um rándýra þjónustu að ræða. Þeir sem vilja láta frysta líkama sinn þurfa að borga fyrir það 30 milljónir króna. Kjósi fólk að frysta aðeins heila sinn þá er verðmiðinn hins vegar rúmar 11 milljónir króna.
„Ég er viss um að á mínu æviskeiði þá munum við sjá að hægt sé að frysta líkama fólks og endurlífga það svo,” segir annar af stofnendum fyrirtækisins, Fernando Azevedo Pinheiro sem er fertugur að aldri.
Aðferðin sem beitt er að strax eftir andlátið er sjá starfsmenn Tomorrow Bio um að setja líkama hins látna í ísbað en veita á meðan hjartanudd til þess að hægja á niðurbroti líkamans. Markmiðið er að koma líkamanum sem fyrst í geymsluhitastigið sem er minus 198 gráður á Celsíus.
Ef hiti líkamans færi hins vegar svo langt niður myndi vatn í hinum ýmsu frumum líkamans frjósa, ískristallar myndast og valda óafturkræfum skaða. Til þess að koma í veg fyrir slíkt þá er vökvum líkamans, til að mynda blóði, skipt út fyrir einskonar frostlög. Líkama viðskiptavina er svo komið fyrir í sérstökum frystum þar sem fljótandi vetni mun halda þeim köldum um ókomna tíð, samkvæmt loforði fyrirtækisins.
