Fíkniefni með merki þýska nasistaflokksins eru aftur komin á götuna á Íslandi. Sams konar efni fundust hér á landi árið 2015 og hafa fundist í nokkrum öðrum löndum. Hafa sumir áhyggjur af því að verið sé að dreifa hatursáróðri til fíkniefnaneytenda.
Doktor Zoe Dubus, meðlimur í frönskum samtökum um hugvíkkandi efni, greinir frá þessu á X síðu sinni. Efnin eru í formi hakakrossins með erni ofan á. Þessi efni hafa fundist í Frakklandi, Hollandi, Sviss og á Íslandi á þessu ári að hennar sögn. Eru þetta einhvers konar hugvíkkandi efni, LSD eða MDMA.
„Við vitum ekki hvaða efni þetta eru en þau hafa verið send í greiningu,“ segir Dubus. Þau efni sem hafi verið greind hafi verið MDMA.
Sams konar mál kom upp á Íslandi árið 2015. Þá varaði Lögreglustjórinn á Suðurnesjum við því að LSD töflur með merki hakakrossins væru komnar á götuna.
Að sögn lögreglunnar voru efnin afar sterk, en mörg mál höfðu komið upp þar sem fólk hafði neytt þessa efna og var „gjörsamlega út úr heiminum.“ Fólkið hafi verið stórhættulegt bæði sér og öðrum. Sagði lögreglan að „aðilar sem eru undir áhrifum þessarar töflu geta verið mjög varasamir með brenglað sársaukaskyn.“
Voru lögreglumenn varaðir við því að koma við töflurnar með berum höndum. LSD geti smitast í gegnum húðina og viðkomandi þá fundið fyrir áhrifum efnisins.
Nasistadóp hefur fundist í mörgum öðrum löndum á undanförnum árum. Meðal annars fundust 7.900 skammtar af LSD með lituðum hakakrossi í Argentínu árið 2017.
Ári seinna fundust MDMA töflur í Austurríki merktar með merki SS-sveitanna. En það voru sérstakar öryggis og hersveitir þýska nasistaflokksins og störfuðu undir forystu hins alræmda Heinrich Himmler.
LSD og MDMA töflur hafa fundust í nokkrum öðrum löndum. En merki nasistanna hefur ekki aðeins verið notað á hugvíkkandi efni. Árið 2023 fundust 50 kíló af kókaíni í Perú, pökkuð inn í pakkningar með hakakrossinum á.
Fyrir utan að vera afar hættuleg og ófyrirsjáanleg efni þá hafa þessar nasistamerkingar valdið ugg. Það er að með því að merkja efnin á þennan hátt sé verið að koma hatursáróðri til fíkniefnaneytendanna.
„Það eru sífellt stækkandi hópar sem ógna samfélaginu,“ sagði Dubus í færslu. „Fólk sem notar þessi efni til þess að festa í sessi fasíska hugmyndafræði. Til að þétta raðirnar og gera sig gildandi. Þetta er hryllilegt.“
