Úkraínskir hermenn segja að Rússar séu farnir að nota nýja og hrottalega aðferð þegar þeir ráðast á varnarlínur Úkraínumanna. Hafa úkraínsku hermennirnir skýrt þessa aðferð „kjötárásir“.

BBC segir að bardagarnir í fremstu víglínunum í Úkraínu verði sífellt grimmdarlegri og nú hafi Rússar tekið nýja aðferð í notkun, svokallaðar „kjötárásir“.

BBC hefur eftir Anton Bayev, lautinant í úkraínska þjóðvarðliðinu, að í þessari aðferð felist að Rússar sendi hermenn sína beint að úkraínsku hermönnunum og þar með í opinn dauðann því Úkraínumenn neyðast til að skjóta þá og koma þá um leið upp um staðsetningu sína.

„Rússarnir nota þessar herdeildir í flestum tilfellum aðeins til að sjá hvar vopnin okkar eru staðsett og til að þreyta hersveitirnar okkar. Okkar fólk er í sínum varnarstöðvum og berst en þegar fjórar-fimm bylgjur koma á einum degi og við verðum að eyða þeim, þá er það mjög erfitt. Bæði líkamlega og andlega,“ sagði Bayev.

Eins og gefur að skilja þá kostar þessi aðferð Rússa mörg mannslíf, sem Pútín er auðvitað alveg sama um, en margir vestrænir sérfræðingar telja að 1.200 Rússar hafi fallið að meðaltali daglega í maí og júní.

Rússar hófu stórsókn í Kharkiv í maí og segjast hafa náð mörgum bæjum og þorpum á sitt vald. Mánuðina á undan höfðu þeir náð að hernema fleiri svæði en úkraínski herinn glímdi á sama tíma við skort á hermönnum og skotfærum.