Þann 13. júní síðastliðinn dæmdi Héraðsdómur Norðurlands eystra mann í 15 mánaða skilorðsbundið fangelsi, meðal annars fyrir að hafa haft í fórum sínum og dreift hundruðum ljósmynda og tugum myndskeiða af börnum í klámfengnum aðstæðum.
Mbl.is greindi fyrst frá.
Myndefnið var haldlagt við húsleit lögreglu á heimili mannsins en maðurinn vistaði það í farsíma, spjaldtölvu og turntölvu. Mun hann hafa dreift efninu til annarra í gegnum spjallsíður á netinu.
Maðurinn gerðist einnig sekur um vopnalagabrot en á heimili hans fundust tvö sverð og stunguhnífur með 18,5 cm blaði.
Maðurinn játaði sök í málinu.
Í dómnum kemur fram að barnaníðsefnið hafi verið mjög gróft og var það virt til refsiþyngingar. Hins vegar var það virt til refsilækkunar að maðurinn á ekki sakaferil að baki og var samvinnufús við rannsókn málsins, einnig er skýlaus játning hans virt honum til refsilækkunar.
Dóminn má lesa hér.
