Nú vilja ráðamenn í Kreml loka fyrir straum innflytjenda frá Mið-Asíuríkjum en hagfræðingar vara við þessum fyrirætlunum og segja þær allt annað en snjallar eins og staðan er í dag.
Það er slegist harkalega í Moskvu um að vera talinn harðasti Rússinn, maðurinn með hörðustu afstöðuna til stríðsins, til Vesturlanda og eiginlega bara allra málaflokka.
Einn þeirra sem verður að teljast líklegur kandídat til að hljóta titilinn er Aleksandr Bastrykin. Hann er sjötugur og hefur árum saman verið formaður rannsóknarnefndarinnar sem er stofnun sem má kannski einna helst líkja við bandarísku alríkislögregluna FBI.
Jótlandspósturinn segir að hann hafi gagnrýnt harkalega skort á eftirliti með farandverkafólki en málefni þess hafa verið mjög í sviðsljósinu í Rússlandi að undanförnu eftir að hópur öfgamanna frá Tadkistan myrti tugi manna í tónleikasalnum Crocus City Hall í Moskvu.
Bastrykin hefur gagnrýnt ákæruvaldið og þingið harkalega fyrir að leiða þennan vanda hjá sér og segja rússneskir fjölmiðlar að þetta hafi gert að verkum að nú sé þingið að vinna að 25 lagafrumvörpum sem eiga að herða reglurnar á þessu sviðið.
Það er af nógu af taka ef það á að taka á þessum málum af alvöru því það eru að minnsta kosti 10 milljónir innflytjenda í Rússlandi, hugsanlega eru þeir mun fleiri, að mati sérfræðinga. Talið er að 70-80% þeirra séu frá Mið-Asíu.
Bastrykin vill að fólkið verði sent heim en þó ekki það sem hefur fengið rússneskan ríkisborgararétt, það á að senda á vígvöllinn í Úkraínu.
En hagfræðingar og atvinnurekendur súpa hveljur yfir þessum hugmyndum og segja að ef þetta verður gert geti það haft miklar og alvarlegar afleiðingar fyrir vinnumarkaðinn sem er nú þegar kominn að þolmörkum.
Síðan stríðið hófst hefur orðið mikil fjölgun á störfum sem eru ómönnuð og í mörgum þjónustustörfum og almenningssamgöngum eru Rússar háðir innflytjendum.
Rússneskir hagfræðingar segja að um síðustu áramót hafi vantað 4,8 milljónir manna á rússneska vinnumarkaðinn. Atvinnuleysi mælist 2,6% á landsvísu en í stóru borgunum er skortur á vinnuafli.