Vaða af háhyrningum réðst að skútu í Miðjarðarhafi, skammt fyrir utan Gíbraltar, og sökktu henni með því að gera linnulausar árásir á hana í rúmar tvær klukkustundir. Eigandi skútunnar, Robert Powell, og áhöfn hans höfðu aðeins siglt í um 22 klukkustundir þegar árásin átti sér stað en ferðinni var heitið frá Portúgal til Grikklands.
Í viðtali við breska fjölmiðlafyrirtækið SWNS segir Robert að háhyrningarnir hafi greinilega ekki verið að leika sér heldur verið ákveðnir í að sökkva bátnum og vitað nákvæmlega hvernig þeir ættu að fara að því. Þeir hafi umkringt bátinn eins og úlfar og skipst á að láta höggin dynja á honum. Þá hafi þeir einbeitt sér að stýri bátsins til að byrja með og gert bátinn þannig stjórnlausan. Eftir að það var tryggt hafi háhyrningar skipt liði og hver og einn einbeitt sér að árásum á kjöl skútunnar.
Powell segir að um ógnvekjandi reynslu hafi verið að ræða en hann hafi reynt ýmislegt til að fæla háhyrninganna frá bátnum. Hent flugeldum fyrir borð og reynt að slökkva á öllum vélum til að láta þá missa áhugann á skútunni. En allt kom fyrir ekki og eftir rúmlega 90 mínutur af árásum hafi loks komið gat á kjöl skútunnar og vatn flætt inn. Þá hafi verið útséð með örlög skútunnar og hún sökk að lokum niður á hafsbotn. Skömmu áður hafði spænskt björgunarskip komið Powell og bátverjum hans til bjargar.
Nokkuð reglulegar fréttir hafa borist af háhyrningum sem ráðast á báta og skip í Miðjarðarhafi. Powell segist sannfærður um að hópurinn sem réðst á hann séu þaulreyndir í slíkum árásum og telur hann ekki langt að bíða að alvarlegra atvik, í stríðinu milli skipverja og háhyrninga, eigi sér stað.
