Afskipti lögreglu af manni við umferðareftirlit fyrr í sumar leiddu til þess að krafist var gæsluvarðhalds yfir honum. Maðurinn, sem er frá Georgíu, framvísaði fölskum skilríkjum en er auðkenni hans var rannsakað kom í ljós að hann sætir endurkomubanni til landsins í fjögur ár, frá 2023 til 2027.

Maðurinn kannaðist ekki við endurkomubann en framvísaði hjúskaparvottorði. Sýslumaðurinn á Suðurlandi krafðist gæsluvarðhalds yfir manninum til að hægt væri að tryggja brottflutning hans frá landinu, ella væri hætta á að hann færi í felur og dveldist hér áfram ólöglega.

Verjandi mannsins benti á að maðurinn væri í hjúskap með íslenskri konu og hefði gengið barni hennar í föðurstað. Hann hafi talið sig hafa heimild til veru hér á landi á meðan mál hans væri til meðferðar og verið í góðri trú með það.

Héraðsdómur Suðurlands byggði á því að maðurinn væri í hjúskap með konu hér á landi og hefði lagt fram gögn til sönnunar um áform þeirra að flytjast til annars lands. Þessar fyrirætlanir útiloki ekki að maðurinn brjóti endurkomubann hans en engu að síður  væri hægt að beita vægari úrræðum en gæsluvarðhaldi til að tryggja brottflutning mannsins frá landinu. Hafnaði Héraðsdómur Suðurlands því kröfu sýslumanns um gæsluvarðhald.

Þann 1. júlí sneri Landsréttur þessum úrskurði við og úrskurðaði að maðurinn skyldi sæta gæsluvarðhaldi til 11. júlí.

Sjá nánar hér.