Ræktendur níu vikna Samoyed tíkarhvolps hafa fínkembt svæðið þar sem hún týndist á föstudag nálægt Egilsstöðum. Björgunarsveitir hafa tekið þátt í leitinni. Fólk er beðið að láta vita af Samoyed hvolpum, sem eru afar sjaldgæfir hér á Íslandi, því ræktendurnir hafa nákvæma tölu á þeim.
Þrjár tíkur týndust á föstudag af bænum Refsstöðum í Fellum í Fljótsdal, um 12 kílómetrum frá Egilsstöðum, Fellabæjarmeginn. Þetta var hin níu vikna Samoyed hvolpatík Mirabel, móðir hennar og annar Labrador tíkarhvolpur.
„Klukkan hálf átta um morguninn tek ég eftir því að þær voru ekki heima. Við vorum að græja okkur til að fara á ættarmót,“ segir ræktandinn Agnes Klara Ben Jónsdóttir. „Klukkan tíu fórum við um og kölluðum og þá komu hinar tvær en ekki litli hvolpurinn.“
Síðan þá hefur verið leitað og leitað en ekki fundist tangur né tetur af Mirabel. Fyrst kom mágur eiginmanns Agnesar frá björgunarsveitinni á Neskaupstað með dróna og leitaði um helgina á meðan batteríið leyfði.
Núna er björgunarsveitin á Eskifirði að leita með dróna sem geltir. Einnig hafa verið notaðar hitamyndavélar til að fínkemba svæðið.
Að sögn Agnesar er ekki hægt að verjast þeirri hugsun að Mirabel hafi verið stolið. En hvolpar eins og hún kosta 500 þúsund krónur.
„Það er alltaf einhver umferð sem kemur hingað upp eftir þó við séum í botngötusveit. Maður veit aldrei. Mestu líkurnar eru að hún sé einhvers staðar hérna á landinu,“ segir Agnes.
Því miður séu dæmi um hvolpaþjófnað á Íslandi. Veit Agnes til þess að hvolpi hafi verið stolið úr goti hérlendis og hann síðan fundist þremur árum seinna.
Biður Agnes því fólk um að láta þau vita ef Samoyed hvolpur sést á ferð. Þá sé hægt að útiloka þá því aðeins einn annar ræktandi sé á Íslandi og hvolparnir úr því goti séu ekki komnir á heimili.
„Það eru aðeins níu hvolpar búnir að fæðast á þessu ári. Það eru fjórir farnir á heimili en þessi var aðeins lengur hjá okkur af því að fólkið sem átti að taka hana átti bókaða ferð erlendis. Þau eru í molum eins og við,“ segir Agnes. En Mirabel átti að fara til þeirra núna í lok mánaðar.
„Við vitum nákvæmlega hversu margir hvolpar eru í umferð af þessari tegund. Ef einhver birtist með hvolp getum við séð hvort um er að ræða fólk með hvolp frá okkur eða ekki,“ segir hún.
