Heimsfaraldur kórónuveirunnar gæti hafa haft þau áhrif að fjölgun hafi orðið á ofbeldistilfellum meðal barna hérlendis, sem og utan landsteinanna. Þetta hefur Morgunblaðið eftir Ólöfu Ástu Farestveit, forstjóra Barna- og fjölskyldustofu.
„Við höfðum gríðarlegar áhyggjur af því að börn yrðu einangruð heima þar sem ofbeldi og drykkja innan heimila jókst,“ segir Ólöf í umfjöllun blaðsins. Börn sem voru á aldrinum tíu til tólf ára þegar samkomutakmörkunum var komið á eru nú kannski á þeim stað að þau upplifa reiði og vanlíðan sem hefur magnast með árunum og brýst út í ofbeldishegðun unglinga, mögulega vena áfalla sem þau upplifðu heima á tímum faraldursins. Engar rannsóknir eru þó til sem styðji þetta en þetta sé umræða meðal þeirra sem starfa í geiranum.
Tilefni umfjöllunarinnar er tilkynning á vef Barna- og fjölskyldustofu þar sem farið er yfir tölfræði fyrstu þriggja mánaða ársins. Þar kemur fram að tilkynningum til barnaverndarþjónustu fjölgaði um 16,7% á fyrstu þremur mánuðum ársins samanborið við sama tímabið árið á undan. Mest varð fjölgunin í Reykjavík, 20,3% þó tilkynningum hafi líka fjölgað á landsvísu.
Flestar tilkynningar berast vegna vanrækslu, sem eru 40,4% allra tilkynninga en áhættuhegðun ungmenna er næstalgengasta ástæða tilkynninga eða 33,9% en mikil hækkun er í þessum flokki. Þar er gríðarleg fjölgun í einum undirflokki sem eru tilkynningar vegna vímuefnaneyslu barna, sem hækka um 118,9% milli ára, sem er áhyggjuefni.
