Veiðimaðurinn og veiðiréttarhafinn Árni Baldursson, gjarnan kallaður Árni Bald, er reiður yfir óheftri netaveiði í Ölfusá, Hvítá og Sogi. Hann beinir spjótum sínum að Fiskistofu og formanni Veiðifélags Árnesinga.

„Í mörg ár hafa fiskifræðingar sagt að náttúruleg framleiðsla á laxaseiðum séu langt yfir hættu mörkum í Sogi , allt of lítið af laxi og allt of lítil hrygning , áin ekki sjálfbær,“ segir Árni í beittri færslu á samfélagsmiðlum. „Þessir ágætu fiskifræðingar hafa lagt hart að okkur leigutökum og veiðimönnum að sleppa öllum laxi stórum sem smáum, og það höfum við gert um árabil, en það dugir ekki til laxastofn Sogsins minnkar og minnkar með hverju árinu og árlega valda seiða talningar áhyggjum og miklum vonbrigðum.“

Vonbrigðin séu hins vegar ekki nógu mikil til að eftirlitsaðilar Fiskistofu bregðist við á neinn hátt.

Árni segir hömlulaus dráp á villtum laxastofnum stunduð í Ölfusá og Hvítá, það er á leið sinni til heimkynna í Soginu og uppám Árnessýslu. Stofninn sé stöðvaður og drepinn á leið á hrygningarstöðvarnar.

„Það eru engar reglur með fjölda laxa sem má drepa í netunum, það eru engir kvótar .. þessir menn mega hreinlega drepa allan þann lax sem hönd á festir,“ segir Árni. Á sama tíma megi aðilar í uppám Árnessýslu ekki drepa einn einasta lax, öllu verði að sleppa.

Beinir Árni spjótum sínum að Jörundi Gaukssyni, formanni Veiðifélags Árnesinga,  „formaður sem á að gæta þess að vernda , hlúa að og friða það sem eftir er að stofninum … en nei hann drepur allan þann lax sem hann kemst yfir,“ segir Árni.

Vill Árni að Fiskistofa skoði þetta mál gaumgæfilega. Ekki sé hægt að vernda stofn sem á undir högg að sækja þegar hann sé drepinn neðar í vatnakerfinu.

„Ég ber fulla virðingu fyrir Fiskistofu … en það er löngu tímabært að taka á þessum netaveiðum af fullum krafti. Þetta er afskaplega slæmt fyrir okkur Íslendinga og vekur heimsathygli þar sem við Íslendingar erum þekkt fyrir að vernda laxinn okkar og allir haldið að við veiðum ekki og drepum lax í net,“ segir Árni að lokum.