Viðskiptavinur hjá KFC Keflavík birti mynd af hráum kjúklingabita í FB-hópnum Matartips ásamt hæðnisfullum texta á ensku sem skrifaður er í orðastað stjórnar KFC. Myndbirtingin vekur miklar umræður en flestum þykir hrár kjúklingur vera sérstakleg ógeðfelldur.
Einn fyrrverandi viðskiptavinur staðarins skrifar:
„Ég var þarna með dóttur minni fyrir ca 2 árum og við keyptum okkur bita. Sá fyrsti var hrár (lak blóðlitaður vökvi úr honum og kjötið var hrátt inni við beinið). Ég varð hissa yfir þessu og fékk nýjan bita – sama saga aftur.
Þá fór ég og talaði vingjarnlega við starfsmann að nú hefði þetta gerst 2x í röð og bara að benda þeim á að athuga hvort þeir þyrftu ekki að lengja steikingartímann.
Hann náði í yfirmann og hún hellti sér yfir mig…sagði að ég væri að ýkja og blóðið læki ekki úr bitanum en ég talaði eins og það fossaði blóð úr honum.
Ég varð ansi hvumsa og kvaddi bara og ákvað að fara aldrei aftur á þennan stað eftir þessa furðulegu uppákomu.“
Nokkrir meðlimir í hópnum gagnrýna þetta framtak viðskiptavinarins og segja eðlilegra að beina kvörtunum yfir hráum mat til starfsfólks staðarins í stað þess að birta slíkar myndir á Facebook. Einn segir:
„Pældu í að vera það pirraður yfir keyptum mat sem þú gætir fengið bætt eða endurgreitt að þú eyðir nokkrum klukkustundum í að væla yfir því á Facebook.“