Skelfingarástand kom upp á flugvellinum í Búdapest í Ungverjalandi í gærvöld þegar flug Wizz air var fellt niður vegna alþjóðlegrar tæknibilunar í hugbúnaði Microsoft. Úr vöndu var að ráða fyrir fjölda fólks því gistirými í borginni er nú mjög takmarkað vegna Formúlu 1 kappaksturskeppninnar sem haldin er þar núna.
Meðal þeirra sem lentu í þessum hremmingum var Orri Ragnar Árnason, athafnamaður frá Hellu, sem þarna var ásamt eiginkonu sinni, en Orri hafði gengist undir meðferð á Íslensku Klíníkinni.
„Það bætir ekki úr skák að ég er í hjólastól. En fyrst var sífellt verið að fresta fluginu þar til allt í einu kom tilkynning um að það væri cancelled. Flugið bara strokað út og okkur sagt að redda okkur, annaðhvort fá endurgreitt eða endurbóka. Gisting var áhyggjuefni en því var bara eytt í einum grænum. Bara nokkrum mínútum eftir að fluginu var aflýst þá var hringt í okkur og sagt, farið bara niður á Zone 6 og þið verðið sótt. Þá var íslenska Klíníkin komin í málið og bjargaði öllu fólkinu.“
Orri segir að stofan hafi bjargað minnst átta manns um gistingu en líklega fleiri, en þessi átta manns höfðu verið í meðferð hjá stofunni. „Það var fullt af fólki var öðrum stofum sem var strandaglópar og lenti í vandræðum.“
Orri hefur vart orð til að lýsa hrifningu sinni yfir þjónustunni sem hafi svo sannarlega lagað vonda stöðu sem var komin upp. „Ég er meira en sáttur við þau, þeim bar engin skylda til að gera þetta. Þetta er ótrúleg þjónusta, eiginlega á heimsmælikvarða og við vorum alls ekki að reikna með þessu.“
Hann segist hafa endurbókað en vandinn sé sá að það er ekki laust flug fyrr en á föstudaginn. „Við verðum bara áfram hér á hótelinu þangað til. Ég er í hjólastól og fer ekki að standa í tengiflugi eða slíku veseni.“
Hann segir að Íslenska Klíníkin hafi bjargað fleiru en gistingu. „Aðaláhyggjuefnið voru lyfin mín, ég var ekki með lyf út allt tímabilið, en þau sögðu bara, engar áhyggjur, við reddum þessu.“
Orri hefur ákveðið að gera gott úr öllu saman, nágrannar á Hellu munu sjá um hundinn hans og ketti sem bíða heima. „Við erum öll ein stór fjölskyld þar,“ segir hann.
„Þetta er pirrandi en fer vel allt saman. Þegar maður fær svona mikla aðstoð þá fjúka vandræðin burt. Þetta er ómetanlegt og ég sé ekki fyrir mér að þetta myndi gerast annars staðar.“
DV sló á þráðinn til Hjalta Garðarssonar, sem ásamt Hrafnhildi Sigurðardóttur konu sinni og syninum Hauki Hjaltasyni eiga og reka Íslensku Klíníkina í Búdapest, en þau búa öll og starfa þar. Aðspurður sagði Hjalti reddingar næturinnar vera sjálfsagðan hluta af þjónustunni og þrátt fyrir raskið hafi nú bara verið nett stemmning í hópnum þegar allir voru komnir í örugga höfn inni á Aquaworld hótelinu þar sem stofan er staðsett. „Það er reynsla okkar Hrafnhildar að landar okkar geti snúið svona raski upp í eitthvað jákvætt, sigur andans og allt það.“
Greint var frá málinu á Facebook-síðu stofunnar í gærkvöld en þar segir:
„Wizz Air aflýsti flugi til Íslands. Eigendur stofunnar fóru á stjá og fengu herbergi á hótelinu fyrir sína viðskiptavini sem urðu strandaglópar. Ég ætla rétt að vona að umboðsmenn annarra tannlæknastofa meti sína viðskiptavini jafn vel og við og hafi útvegað sínum viðskiptavinum húsaskjól. Rútan okkar er með þakkláta og þreytta strandaglópa á leið á Aquaworld Resort.“
