Melania gæti hugsanlega leikið töluvert hlutverk í að auka vinsældir Trump en ef hún heldur áfram að halda sig til hlés gæti það haft neikvæð áhrif á fylgi Trump.
AP segir að Melania hafi ekki fylgt eiginmanni sínum á neina opinbera, mikilvæga atburði í tengslum við forsetaframboð hans síðan í mars. Hún var ekki við hlið hans þegar hann hleypti kosningabaráttu sinni af stað í Iowa, ekki á sigurhátið hans á „Ofur þriðjudeginum“ og hún lét ekki sjá sig við réttarhöldin yfir Trump vegna „Stormy Daniels málsins“ í New York.
Ekki er talið útilokað að fjarvera Melania hafi áhrif á vinsældir Trump en „Stormy Daniels málið“ hefur reynst honum erfitt. Margir þeirra, sem hafa efasemdir um Trump vegna málsins, myndu kannski hafa minni efasemdir ef Melania væri við hlið hans.
Allt frá því að orðrómar, um meint framhjáhald Trump með Stormy Daniels, fóru á kreik 2018 hefur Melania verið lítt áberandi.
Þetta hefur ýtt undir vangaveltur um af hverju hún hefur haldið sig frá sviðsljósinu. Í Bandaríkjunum hefur alltaf verið mikilvægt fyrir forsetann að eiginkona hans sé sterk út á við. Má þar nefna að Michelle Obama lék stórt hlutverk þegar Barack Obama var forseti. Það sama á við um Hillary Clinton sem lét mikið að sér kveða þegar Bill Clinton var forseti.