Fimm númeralausir bílar, að virðist í mjög slæmu ástandi, gera Fjölskylduhjálp Íslands lífið leitt, en bílunum hefur verið lagt í stæði fyrir utan Iðufell 14, þar sem Fjölskylduhjálpin starfrækir matarúthlutanir sínar til fátækra og þurfandi borgara.
Formaður Fjölskylduhjálparinnar, Ásgerður Jóna Flosadóttir, er ráðlaus vegna þess vandamáls. Dráttarbílaþjónusta Vöku fjarlægir bíla sem lagt er ólöglega, á kostnað eigenda þeirra. Gallinn er sá að ef eigandi bílsins finnst ekki fellur kostnaðinn á þann sem tilkynnir og biður um að bíllinn sé fjarlægður.
„Það kostar 50 þúsund krónur á bíl og við getum ekki tekið áhættuna á því að þurfa að borga 250 þúsund krónur,“ segir Ásgerður.
Aðspurð segir hún að bílarnir trufli starfsemina og séu til ama. „Þeir taka líka stæði frá þeim skjólstæðingum okkar sem koma á bíl,“ segir hún ennfremur.
Ásgerður vonast til þess að eigendur bílanna sjái sóma sinn í því að fjarlægja þá.