Íbúar á Ströndum og Reykhólasveit eru óhamingjusamastir á landinu. Þetta kemur fram í niðurstöðum Íbúakönnunar landshlutanna sem birtist á vef Byggðastofnunnar fyrr í dag. Könnunin var lögð fyrir landsmenn um allt land en rúmlega 12 þúsund svör bárust. Spurt var um fjölmarga þætti sem snúa að búsetuskilyrðum í hverjum landshluta, til að mynda þjónustu sveitarfélagsins, atvinnuhorfur, innviði og almenna líðan.
Meðal annars voru þátttakendur látnir svara spurningunni: „Hversu hamingjusamur/hamingjusöm ertu í dag þegar þú horfir til allra þátta í lífi þínu?“ á skalanum 1-10. Eins og áður segir voru íbúar á Ströndum og Reykhólum óhamingjusamastir en blessunarlega var það þó ekki verra en svo að meðtal svara íbúanna hljóðaði upp á 7,48. Íbúar í sveitarfélaginu Vogum voru litlu hærri eða með 7,53 á meðan íbúar í Vestur-Húnavatnssýslu gáfu einkunnina 7,55.
Hamingjusamastir voru Skagfirðingar með einkunnina 8,08 enda drýpur kaupfélagssmjörið þar af hverju strái. Íbúar í Múlaþingi og Norður-Múlasýslu gáfu einkunnina 8,04 og íbúar á Snæfellsnesi voru skammt undan með 8,02.
Höfuðborgarbúar voru mitt á milli þeirra kátustu og döprustu með einkunnina 7,79.
Það er fámennt en góðmennt á Ströndum og í Reykhólasveit og spurning er hvort að íbúarnir vilja meira fjör í kringum sig. Spurt var í könnuninni hvort gott mannlíf væri á svæðinu og voru valkostirnir frá 1 (mjög slæmt) og upp í 5 (mjög gott). Strandamenn og Reykhólabúar gáfu mannlífinu aðeins einkunn upp á 3,52 sem var það lægsta á landinu. Íbúar í Reykjanesbæ gáfu mannlífinu þar einkunn upp á 3,67 og íbúar í Vogum gáfu einkunn upp á 3,82.
Íbúar Vestmannaeyja voru langánægðist með lífið í suðri og gáfu einkunnina 4,43, Norður Vestfirðir voru skammt undan með 4,30 og Grindvíkingar voru einnig sáttir með 4,27.
Athygli vekur að íbúar Höfuðborgarsvæðisins gáfu mannlífinu „aðeins“ 4 í einkunn og voru um miðjan hóp landsmanna.
Hér er hægt að kynna sér niðurstöður könnunarinnar.