Lögreglan á höfuðborgarsvæðinu handtók tvo menn eftir að annar þeirri lenti í hættulegu vinnuslysi í miðbænum í dag. Þetta kemur fram í dagbók lögreglunnar en þar kemur fram að tilkynnt hafi verið um vinnuslys í hverfi 101. Karlmaður hafi þá dottið niður um 4-5 metra og verið fluttur á bráðamóttöku til skoðunnar þar sem blessunarlega kom í ljós að meiðslin voru minniháttar.
Þá komst hins vegar upp að maðurinn, sem og samstarfsmaður hans, dvöldust ólöglega hér á landi og höfðu ekki réttindi til að stunda hér atvinnu. Voru mennirnir því báðir handteknir og er mál þeirra í skoðun.
Auk þessa máls voru 94 önnur skráð í LÖKE-kerfi lögreglu síðastliðnar tólf kullustundir. Um var að ræða hin ýmsu atvik, allt frá aðstoðarbeiðnum vegna veikinda, til fólks í annarlegu ástandi, þjófnaði og því miður allt of mörg umferðarlagabrot, vegna hraðaksturs sem og aksturs undir áhrifum.