Nýlega ógilti ríkissaksóknari þá ákvörðun lögreglustjórans á höfuðborgarsvæðinu að hætta rannsókn á kæru gegn þeim Semu Erlu Serdaroglu og Maríu Lilju Þrastardóttur fyrir mútur í starfsemi hjálparsamtakanna Solaris. Lögmaðurinn Einar Hálfdanarson kærði konurnar.
Ríkissaksóknari hefur gert lögreglustjóranum á höfuðborgarsvæðinu, Höllu Bergþóru Björnsdóttur, að taka rannsóknina upp á ný.
Morgunblaðið fjallar um málið í leiðara blaðsins í dag og fer hörðum orðum um framgöngu Höllu Bergþóru. Í leiðaranum segir:
„Um opinberar fjársafnanir gilda sérstök lög til að koma í veg fyrir svikahrappa, hirðuleysi eða peningaþvætti. Þær skulu vera í löglegum tilgangi, eru háðar opinberu leyfi og áskilnaður er um fjárreiðurnar. Um allt þetta eru áhöld varðandi söfnun Solaris.
Hitt er þó alvarlegra að miðað við frásagnir hinna kærðu forsvarsmanna söfnunarinnar og annan fréttaflutning frá landamærum Egyptalands við Gasasvæðið kann stór eða stærstur hluti fjárins að hafa verið notaður til mútugreiðslna til egypskra embættismanna. Allt er það ískyggilegra en ella vegna þess hernaðar- og hryðjuverkaástands sem ríkir á Gasa.
Mútugreiðslur eru bannaðar að lögum að viðlögðu allt að sex ára fangelsi, en jafnframt er Ísland aðili að alþjóðlegasamningum og samstarfi gegn mútum og mikilvægt að Ísland virðist ekki gefa neinn afslátt í þeim efnum.“
Morgunblaðið bendir á að sakirnar séu alvarlegar og lögreglustjóri hafi ákveðið að taka málið til rannsóknar en hafi síðan ákveðið að fella niður rannsóknina án nokkurs rökstuðnings. Beiðni ríkissaksóknara um rökstuðning hafi ekki verið svarað.
„Sakarefni hafi ekki einu sinni verið skilgreind líkt og lög mæla fyrir um, ekkert hafi komið fram um að sjálfstætt mat hafi verið lagt á athafnir hinna kærðu eða sjálfstæð niðurstaða fengin um að ekki væri um opinbera fjársöfnun að ræða. Það byggðist aðeins á neitun kærðu, þó að opinberlega hefði engin dul verið dregin á að um fjársöfnun væri að ræða.“
Morgunblaðið segir málið með ólíkindum og sá grunur læðist að leiðarahöfundi að lögreglustjóri hafi fellt niður rannsóknina til að forðast óþægilegan árang frá aðgerðasinnum sem styðja hælisleitendur frá Gasa. Síðan segir:
„Aðeins af formlegri þáttum málsins er ljóst að Höllu Bergþóru lögreglustjóra varð illilega á í messunni um grundvallaratriði í starfsháttum lögreglu. Verra er þó að það virðist hafa verið geðþóttaákvörðun, hvorki reist á lögum né málefnalegum ástæðum. Það hlýtur að kalla á tiltal dómsmálaráðherra.“
Morgunblaðið segir að borgarar þurfi að treysta því að lögreglustjóri láti ekkert trufla framgang réttvísinnar og láti ekki lög og reglur víkja fyrir góðum málstað. „Fyrir lögum verða allir að vera jafnir.“
