Kona sem fór í sjóinn aðfaranótt sunnudags fannst á lífi, um einum og hálfum sólarhring síðar. Nútíminn greindi fyrst frá málinu en í umfjöllun RÚV kemur fram að viðbragðsaðilar líki fundi konunnar við kraftaverk.
Tilkynnt var um að konan hefði farið í sjóinn úti á Granda. Umfangsmikil leit af konunni var sett af stað og tóku á áttunda tug björgunarfólks þátt auk lögreglu. Leitað var úr þyrlu Landshelgisgæslunnar sem og með hitadrónum.
Á ótrúlegan hátt fannst konan svo á lífi úti í Engey en þangað höfðu hafstraumar borið hana. Hún lagðist til hvílu, köld og hrakin og en hún vaknaði ákvað hún að fara aftur út í sjó og reyna að synda í land. Blessunarlega komu skipverjar á smábát auga á hana og björguðu henni úr sjónum.
Litlar upplýsinga hafa verið gefnar um málið og þykir það afar viðkvæmt. Ekki er vitað um líðan konunnar að svo stöddu, annað en að hún er á lífi, sem er kraftaverki líkast, eins og áður segir.
Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
