Karlmaður á fertugsaldri hefur játað að hafa drepið 42 konur á undanförnum tveimur árum í Kenýa. CNN fjallar um málið sem hefur vakið mikla athygli ytra og orðið til þess að hávær köll eru um að tekið verði á kynbundu ofbeldi í landinu sem grasserar víða.

Hinn 33 ára gamli Collins Jumaisi Khalusha er sagður hafa lokkað og drepið konurnar en aðeins níu lík hafa fundist hingað til. Fyrsta fórnarlamb raðmorðingjans var eiginkona hans en eftir morðið á henni virðist hann hafa komist á bragðið.

Khalusha var handtekinn aðfaranótt mánudags fyrir utan klúbb í borginni Soweto, austur af höfuðborginni Naíróbí, þar sem hann hafði horft á úrslitaleik Evrópumótsins í knattspyrnu. Leiddi Kalusha lögreglumenn að leiguhúsnæði þar sem hann bjó þar sem lagt var hald á ýmis sönnunargögn. Fyrsta fórnarlamb hans var eiginkona hans.

Boðað var til blaðamannafundar vegna handtökunnar en þar kom fram að líkin sem hingað til hefðu fundist hefðu verið brytjuð niður, sett í poka sem var sökkt í yfirgefinni námu.

„Við erum að glíma við raðmorðingja, geðsjúkan morðingja sem ber ekki virðingu fyrir mannslífum,“ hefur CNN eftir yfirmanni rannsóknardeildar lögreglunnar, Mohamed Amin.