Bílar leggja svo langt inn á gangstéttum í Norðurmýrinni að dæmi eru um að gangandi vegfarendur geti ekki lengur gengið eftir þeim. Bílastæðavandinn er mikill í Norðurmýri og Reykjavíkurborg hyggst banna fólki að leggja víða á vegköntum.

Kona sem býr í hverfinu birti færslu og myndir á samfélagsmiðlum sem sýna hversu langt upp á gangstéttina bílar í Norðurmýri eru lagðir. Tóku fleiri undir að þetta væri vandamál og birtu einnig myndir.

„Nú hafa bílastæða málin verið heit og sitt sýnist hverjum og ég skil það alveg að það þarf að leggja örlítið upp á gangstétt en þetta er ekki í lagi. Í tvígang í vikunni hef ég gengið Skeggjagötu og ég er smá vaxin kona og rétt slepp þarna fram hjá!“ segir konan í færslunni.

Annar íbúi birtir mynd úr Auðarstræti. „Ómögulegt að rölta um fallega hverfið okkar. Gerum betur!“ segir hann.

Umdeildar breytingar

Eins og DV greindi frá í upphafi mánaðar hyggst meirihlutinn í borgarstjórn Reykjavíkur gera breytingar í Norðurmýrinni. Það er tillögu í Umhverfis og skipulagsráði um að bannað verði að leggja á tilteknum vegköntum í níu götum.

Fulltrúar Sjálfstæðisflokksins vildu málið í íbúakynningu og sögðu langa hefð fyrir því að íbúar í Norðurmýri legðu bifreiðum sínum beggja megin á köntunum. Áheyrnarfulltrúi Flokks fólksins sagði fyrirhugað bann þrengja mjög að bílum og skapa vandræði fyrir bíleigendur í Norðurmýri. Málið þyrfti að fara í íbúakosningu.

Sjá einnig:

Þrengt að bifreiðaeigendum í Norðurmýri og meirihlutinn sakaður um sýndarsamráð – „Mun að líkindum vekja upp sterk viðbrögð íbúa“

Meirihlutinn sendi málið í staðinn til umsagnar íbúaráðs og slökkviliðs höfuðborgarsvæðisins. Telur meirihlutinn þessa hefð skapa hættu, það er að hvorki slökkvilið né sjúkraflutningamenn geti örugglega athafnað sig á gangstéttunum. Þá skapi þetta einnig erfiðleika fyrir hreyfihamlaða.

Verða að vanda sig

Málið er hins vegar ekki svart og hvítt því að bílastæðavöntun er í hverfinu og götur þröngar. Konan sem setti inn færsluna segist ekki hlynnt fyrirhuguðum breytingum meirihlutans um að banna fólki að leggja við vegkanta. Það skapi aðeins ný vandamál því að einhvers staðar verði fólk að leggja bílunum sínum. Þó sé ljóst að nágrannar hennar verði að vanda sig betur við hvernig þeir leggja. Þetta sé ekki að hjálpa.

Í athugasemdum nefna sumir að þetta sé einmitt ástæðan fyrir því að þeir séu hlynntir fyrirhuguðum breytingum borgarinnar.

„Að labba Skarphéðinsgötu gangstéttina á veturna er ómögulegt svo ég verð mjög feginn þegar þessi breyting gengur í gegn,“ segir einn íbúi.