Eins og DV greindi frá í gær hefur Óskar Steinn Ómarsson sagt frá því að hann hafi verið ráðinn í stöðu deildarstjóra tómstundamiðstöðvar Hraunvallaskóla í Hafnarfirði en ráðningin hafi verið dregin til baka í kjölfar þess að hann gagnrýndi þá ákvörðun meirihluta bæjarstjórnar að loka ungmennahúsinu Hamrinum. Óskar taldi það fyrirslátt að ráðning hans hafi verið dregin til baka á þeim grundvelli að eftir á að hyggja hæfði menntun hans starfinu ekki nógu vel og sagði að beinast lægi við að álykta að um bein tengsl væri að ræða á milli gagnrýni hans og þess að hætt hafi skyndilega verið við að ráða hann í starfið. DV sendi Hafnarfjarðarbæ fyrirspurn vegna málsins og svör hafa nú borist.
Óskar segir Hafnarfjarðarbæ hafa refsað sér fyrir gagnrýnina
DV spurði hvers vegna Óskar var ráðinn upphaflega og hvers vegna ráðningin var dregin til baka. DV spurði einnig að þar sem Óskar segir að þegar ráðningin var dregin til baka hafi það verið skýrt með því að eftir á að hyggja hafi menntun hans ekki hæft starfinu nógu vel hvort það hafi ekki legið fyrir í upphafi hvaða menntun hann hafði og hvers vegna hún var ekki talin hæfa starfinu fyrr en eftir að hann var ráðinn. Einnig var spurt hvort það væri rétt sem Óskar heldur fram að litið hafi verið framhjá því að hann hafi setið fjölda námskeiða um ungmennastarf og ef svo væri hvers vegna hefði verið litið framhjá því þegar ákveðið var eftir á að hann hefði menntun sem hæfði ekki nægilega manneskju sem ætti að gegna þessari stöðu.
Sömuleiðis var spurt um hvort það væri rétt að í tómstundamiðstöðvum bæjarins starfi deildarstjórar með menntun aðra en tómstundafræði eða uppeldis- og menntunarfræði, sem áskilið var í auglýsingunni (eða annað háskólanám sem nýttist í starfi) um deildarstjórastarfið sem Óskar var ráðinn í áður en það var dregið til baka, m.a. stjórnmálafræði eins og Óskar. Ef sú var raunin óskaði DV eftir svörum við því hvort það væri talið ásættanlegt að hafa aðra deildarstjóra með sömu menntun og Óskar starfandi í tómstundamiðstöðvunum en ekki hann.
Loks óskaði DV svara við því að í ljósi þess að ráðning Óskars var dregin til baka í kjölfar þess að hann gagnrýndi opinberlega ákvörðun meirihluta bæjarstjórnar að loka ungmennahúsinu Hamrinum hvort sú ákvörðun að draga ráðninguna til baka hafi eitthvað haft með þessa gagnrýni hans að gera?
Hafnarfjarðarbær svarar flestum spurninga DV ekki beint með vísan til þess að ekki sé heimilt að ræða mál einstakra starfsmanna opinberlega en svar bæjarins er eftirfarandi:
„Lögum og reglum samkvæmt þá tjáir Hafnarfjarðarbær sig ekki um mál einstaka starfsmanna. Markmið sveitarfélagsins er ávallt að ráða hæfasta fólkið hverju sinni og vönduðum stjórnsýsluháttum fylgt við allar ráðningar. Viðmiðið er alltaf viðeigandi menntun og enn stífari kröfur um ráðningar gerðar þegar um stjórnendastöður er að ræða. Ávallt er leitast við að ráða aðila sem uppfyllir hæfniskröfur, stundum þarf að falla frá ráðningu og auglýsa aftur ef ekki sækir um aðili sem uppfylli hæfniskröfurnar.“
Í svari bæjarins kemur hins vegar ekki fram hvers vegna Óskar var yfirhöfuð upphaflega ráðinn, ef hann og aðrir umsækjendur voru ekki taldir uppfylla hæfniskröfurnar, í stað þess að ráða engan af umsækjendunum og auglýsa starfið þess í stað að nýju.
