Útlit er fyrir að álag á Læknavaktina muni aukast enn frekar framvegis þar sem síðdegisvaktir lækna á heilsugæslum höfuðborgarsvæðisins eru nú lagðar af.
Sigríður Dóra Magnúsdóttir, forstjóri Heilsugæslu höfuðborgarsvæðisins segir í samtali við RÚV að meiri áhersla verði lögð á símaráðgjöf í númerinu 1700 þar sem hjúkrunarfræðingur metur erindi og vísar þeim í réttan farveg. „Og þannig er hægt að fá tíma fyrir bráð erindi á öllum okkar heilsugæslustöðvum. Það sem við erum að gera er í raun og veru að færa síðdegisvaktirnar yfir á daginn,“ segir Sigríður Dóra sem metur breytinguna til bóta.
Síðdegisvaktir á heilsugæslum hafa verið þannig um að hægt var að mæta án þess að bóka tíma fyrirfram á svokallaða síðdegisvakt, frá klukkan 16 -18. Undirrituð þekkir þó af eigin raun að mæta klukkan 16 og ekki var tekið á móti fleirum þar sem búið var að fylla alla tíma. Í næsta skipti sem mætt var rúmlega kl. 15 var byrjað að bóka á síðdegisvaktina kl. 15.30 og náðist þá að hitta á lækni.
Margir sem til heilsugæslna þurfa að leita hafa kvartað undan því að fá aldrei tíma, alltaf sé allt uppbókað. Sigríður Dóra staðfestir við RÚV að svo sé raunin: „Það eru allar vikur alltaf fullar og við þurfum bara að finna einhverja leið í haust með hvernig fólk getur pantað tíma lengra fram í tímann.“