Í gær var lokið við að leggja út tilraunamalbik á Reykjanesbraut, nálægt Vogaafleggjara. Lagðar voru út þrjár mismunandi tegundir malbiks, ein með venjulegu malbiki, ein með lífbindiefni sem er aukaafurð úr pappírsvinnslu og ein með lífbindiefni úr grænmetisolíum. 

Þetta er í fyrsta sinn sem lífbindiefni er notað í malbik með þessum hætti á veg hér á landi. Áður hefur verið lagt sambærilegt malbik á göngustíg í Hafnarfirði sem tókst vel, eins og segir í tilkynningu.

Malbikið er þróað af Colas og er tilraunin gerð í samvinnu við Vegagerðina en Rannsóknasjóður Vegagerðarinnar styrkir verkefnið.

„Svona lífbindiefni hafa verið notuð í malbik í Evrópu og það hefur verið rannsakað mikið á rannsóknarstofum,“ segir Björk Úlfarsdóttir, deildarstjóri umhverfis, gæða og nýsköpunar hjá Colas en hún stýrir verkefninu. Hún segir að þrátt fyrir að lífbindiefnin séu ólík  þá eigi þau það sameiginlegt að vera kolefnisneikvæð. „Sem þýðir að kolefnisspor biksins er að allt að 85% minna en kolefnisspor venjulegs biks,“ segir Björk.

Auk þess að minnka kolefnisspor biksins þá mýkir lífbindiefnið malbikið. „Það verður sífellt erfiðara að fá bik sem hentar íslenskum aðstæðum,“ segir Björk. Auðlindir séu af skornum skammti og á Íslandi þurfi mýkra bik en þar sem hlýrra sé: „Þannig að ef vel tekst til með tilraunalögnina þá tryggjum við um leið efni í malbik til framtíðar,“ segir Björk.

Björk segir að fylgst verði mjög vel með öllum þremur malbiksblöndunum sem lagðar voru út í gær. „Allar blöndurnar verða sendar til óháðrar rannsóknarstofu þar sem þær verða ítarlega prófaðar. Við munum einnig fylgjast grannt með þróuninni á vegarkaflanum meðal annars með tilliti til hemlunarviðnáms og hjólfaramyndunar.“ 

Hún segir að bráðabirgðaniðurstöður ættu að liggja fyrir í haust en fylgst verður með þróuninni næstu fimm árin.