Joe Biden var vígreifur á fundi með stuðningsfólki sínu í Norður-Karólínu í gær og sagðist myndu vinna forsetakosningarnar gegn Donald Trump í október. Hann sagðist gera sér grein fyrir því að hann væri ekki ungur maður lengur. „Ég geng ekki eins auðveldlega og áður og er ekki eins góður í kappræðum og ég var,“ sagði forsetinn en sagði síðan: „En ég veit það sem ég veit, ég veit hvernig á að segja sannleikann og ég veit hvernig á að vinna þetta starf.“
Hörmungarframmistaða Biden í sjónvarpskappræðum forsetaframbjóðendanna á fimmtudagskvöld hefur vakið heimsathygli. Þar var Biden vægast sagt óskýr í allri sinni framgöngu og Trump þurfti lítið að hafa fyrir því að rúlla þessum kappræðum upp. Biden virkaði stundum gjörsamlega úti á þekju og frammistaða hans veldur skelfingu í herbúðum demókrata.
BBC greinir frá því að efasemdir sé á meðal stórra styrktaraðila forsetans um framgöngu hans. Er haft eftir einum að það eina sem hefði getað gert frammistöðu hans í kappræðunum verri hefði verið að hann hefði dottið fram af sviðinu. Umræðan um að Biden stígi til hliðar og nýr frambjóðandi komi í hans stað er í fullum gangi innan demókrataflokksins en engin lausn er í sjónmáli.
Sumir benda þó á að forsetakosningarnar tapist ekki í einum kappræðum. Barack Obama, fyrrverandi forseti, segir í tísti á X að slæmar kappræður séu eitthvað sem geti komið fyrir. Eftir sem áður séu þessar kosningar val á milli manns sem hefur barist fyrir hag venjulegs fólks alla ævi og manns sem eingöngu hugsar um eigin hag.
Ekkert áþreifanlegt hefur komið fram sem bendir til þess að demókratar muni ryðja Biden úr vegi á næstunni. Þeir hafa hins vegar miklar áhyggjur af stöðunni.
