Kínversk stjórnvöld fara ekki leynt með andúð sína á Lai Ching-te, sem tók við embætti forseta Taívan í maí, og segja hann vera „aðskilnaðarsinna“. Blésu Kínverjar til stórrar heræfingar í kringum Taívan í tengslum við embættistöku nýja forsetans.
The Guardian segir að Taívanar hafi kvartað undan auknum þrýstingi af hálfu Kínverja síðan Lai sigraði í forsetakosningunum í janúar. Hafa Kínverjar aukið hernaðarumsvif sín nærri Taívan, gripið til viðskiptaþvingana og kínverska strandgæslan hefur auki eftirlit sitt nærri eyjum, sem eru nálægt Kína en undir taívönskum yfirráðum.
Í nýjum leiðbeiningum frá kínversku stjórninni segir að kínverskir dómstólar, saksóknarar og öryggisstofnanir eigi að refsa gallhörðum taívönskum sjálfstæðissinnum fyrir að kljúfa þjóðina. Refsa eigi þeim í samræmi við lög og verja þannig af festu fullveldi, samstöðu og yfirráð yfir landinu. Xinhua ríkisfréttastofan skýrði frá þessu á föstudaginn.
Í tilkynningu stjórnvalda segir að beita eigi dauðarefsingu yfir „forsprökkum“ sjálfstæðisbaráttu því þeir valdi ríkinu og þjóðinni sérstaklega miklu tjóni. Samkvæmt leiðbeiningum stjórnarinnar þá geta aðrir talsmenn sjálfstæðis hlotið fangelsisdóma, allt frá 10 árum til ævilangra.
Xinhua segir að nýju leiðbeiningar, sem tóku gildi á föstudaginn, hafi verið gefnar út í samræmi við gildandi lög, þar á meðal lög frá 2005 sem veita Kínverjum lagalegan rétt til að beita hervaldi gegn Taívan ef eyríkið segir skilið við Kína eða virðist ætla að gera það. Þessi lög eru þó ansi vafasöm því eins og áður sagði er Taívan sjálfstætt ríki og hefur aldrei verið hluti af Kína. Það voru landflótta Kínverjar sem stofnuðu Taívan þegar þeir biðu lægri hlut fyrir kommúnistum í borgarastyrjöld í Kína.
Taívönsk stjórnvöld brugðust við nýju fyrirmælunum með að hvetja Taívana til að láta Kínverja ekki hræða sig og bentu á að Kínverjar hafi nákvæmlega enga lögsögu yfir Taívan eða taívönsku þjóðinni.
