Bátur hefur verið nefndur eftir Hrafni Jökulssyni, rithöfundi og aðgerðarsinna. Bátnum er ætlað að hreinsa fjörur landsins, en Hrafn sem lést í september árið 2022 var ötull við hreinsunarstörf á Ströndum síðustu æviár sín. Vakti hann athygli á mikilvægi þess að hreinsa fjörur landsins af rusli.
„Eitt af því sem Hrafn bróðir minn fékkst við hin síðustu misseri sín var að hreinsa fjörur á Ströndum. Gekk hann til þeirra verka af miklum eldmóði en þurfti svo að bregða sér frá. En sjá! Hér er hann mættur aftur til sömu starfa og nú sem bátur. Vel til fundið og fallegt,“ segir Illugi Jökulsson, bróðir Hrafns og birtir mynd af bátnum.