Karlmaður fæddur 1940 fékk tveggja ára skilorðsbundinn dóm fyrir að áreita konu kynferðislega í sundlaug á Vestfjörðum. Manninum var jafnframt gert að greiða konunni þrjú hundruð þúsund krónur í miskabætur og að greiða tæpar 2,5 milljónir til viðbótar í máls- og sakarkostnað.
Dómurinn var kveðinn upp í Héraðsdómi Vestfjarða þann 10. júní síðastliðinn.
Maðurinn var ákærður fyrir kynferðislega áreitni, með því að hafa ónefndan dag árið 2022, í heitum potti í sundlaug á Vestfjörðum, sem er ekki nánar tilgreind, strokið bert hold við rass konunnar og strokið mjöðm, rass og brjóstsvæði hennar utan klæða.
Í dómnum kemur fram að brotaþoli er starfsmaður sundlaugarinnar, en var ekki við vinnu þegar brotið átti sér stað, gerandi er fastagestur sundlaugarinnar. Tvær aðrar konur voru í pottinum og báru vitni um atvikið, auk þess sem öryggismyndavél er á staðnum.
Brotaþoli sagðist málkunnug manninum og hafa átt reglulega orðaskipti við hann enda væri hann fastagestur í sundlauginni. Hann hefði áður sýnt henni áhuga nokkru fyrir atvikið sem maðurinn var ákærður fyrir. Ákærði hafi eitt sinn rétt henni hendina, hún tekið í hana og hann hafi þá nuddað á henni lófann og spurt hvort „hún myndi hleypa honum inn ef hann kæmi heim til hennar um kvöld“. Hún hafi svarað því að hún myndi henda honum út. Degi síðar bað hann konuna afsökunar á framkomu sinni.
Brotaþoli segir ákærða hafa sest við hliðina á sér í pottinum og hann hafi byrjað að nudda fæti sínum upp við fót hennar. Henni hafi fundist þetta óþægilegt og hafi staðið upp. Þau hafi haldið áfram að spjalla og maðurinn hafi spurt hana hvort hún vildi koma með honum í kalda karið, sem hún neitaði. Hann hafi síðan staðið upp til að fara, en síðan snúið sér við og sýnt þá háttsemi af sér sem hann var ákærður og dæmdur fyrir.
Aðspurð um hvort hún hafi gefið ákærða til kynna að hún vildi ekki að hann snerti sig segist brotaþoli hafa staðið upp og einnig gefið ákærða olnbogaskot. Segist hún einfaldlega hafa frosið og ekki sagt neitt. Henni hafi ekki liðið vel og segir hún háttsemi ákærða hafa opnað gömul sár, verið óþægilegt, kvíðavaldandi og hún hafi fundið fyrir vanlíðan. Hún kvaðst hafa verið að leita sér sálfræðimeðferðar reglulega um langan tíma en hún hafi ef til vill ekki verið nægilega dugleg að sækja tíma hjá sálfræðingi eftir þennan atburð. Hún kvað að sér liði ágætlega nú og væri að vinna í þessu.
Ákærði neitaði sök og að hann hefði nokkru sinni sýnt brotaþola óviðeigandi framkomu. Kannaðist ákærði við að forstöðukona sundlaugarinnar hafi boðað hann á sinn fund og að hún hafi borið upp á hann að hafa sýnt brotaþola kynferðislega áreitni. Hann hafnaði því að hafa viðurkennt einhverja ámælisverða háttsemi í samtali við hana og kannaðist ekki við að forstöðukonan hefði sýnt honum myndskeið úr öryggismyndavélakerfi. Ákærði hafnaði því að nokkuð óeðlilegt hafi gerst í pottinum milli hans og brotaþola, en hefur ekki lýst atvikinu umfram það að segja að þetta hafi verið „venjuleg pottferð“.
Forstöðukonan vistaði kyrrmyndir úr upptöku öryggismyndavélar og sendi til lögreglu, en upptakan sjálf glataðist þar sem vélin geymdi upptökur einungis í þrjá daga. Sagðist hún hafa horft nokkrum sinnum á myndskeiðið og einnig kveðst hún hafa sýnt sveitarstjóra myndbandið. Þetta kvaðst hún hafa gert til að ákveða hvort henni, sem forstöðumanni sundlaugarinnar bæri að bregðast við atvikinu. Kvað hún að eftir samráð við sveitarstjóra hafi verið ákveðið að bregðast ekki við.
Dómari taldi að sú kynferðislega áreitni sem ákærði hefur gerst sekur um væri alvarlegt brot sem beinist gegn mikilvægum hagsmunum. Á hinn bóginn þótti dómara rétt að hafa í huga að ákærði er aldraður maður, án sakarferils, og jafnframt að málið var nokkuð lengi til meðferðar hjá lögreglu, ákæruvaldi og fyrir dómi. Þótti því rétt að fresta ákvörðun refsingar og fellur hún niður eftir tvö ár haldi ákærði almennt skilorð 57. gr. almennra hegningarlaga nr. 19/1940. Konan gerði kröfu um 2 milljónir króna í miskabætur, en dómari taldi þær hæfilega ákveðnar 300.000 krónur. Ákærða ber að greiða allan sakarkostnað málsins sem samtals nemur 2.440.892 krónum.
