Rútuslys varð á Rangárvallavegi í Rangárvallasýslu um fimmleytið í dag. RÚV greinir frá. Ekki liggur fyrir hvað margir voru í rútunni né hve alvarleg slys urðu á fólki. Þó liggur fyrir að færri en 30 voru í rútunni.
Tvær þyrlur Landhelgisgæslunnar voru sendar á vettvang. Hópslysaáætlun var virkjuð vegna slyssins.
Uppfært kl. 18:10 DV náði sambandi við Hjördísi Guðmundsdóttur, samskiptastjóra Almannavarnardeildar ríkislögreglustjóra. Hún hefur í raun ekki enn upplýsingar um alvarleika slyssins, hvort einhverjir farþeganna séu alvarlega slasaðir eða hvort mannsbani hafi orðið.
„Það voru undir 30 manns í rútunni, viðbragðsaðilar eru komnir á staðinn og eru að aðstoða fólk og þyrlur eru á leiðinni. Ítarlegri upplýsingar koma þegar líður á,“ segir Hjördís.
Uppfært kl. 18:20 Í tilkynningu frá Lögreglunni á Suðurlandi kemur fram að rútan valt við bæinn Stokkalæk. Tilkynningin er eftirfarandi:
„Skömmu fyrir kl. 17 í dag barst lögreglu tilkynning um að rúta hefði oltið á Rangárvallavegi við bæinn Stokkalæk. Um þrjátíu farþegar voru í rútunni og aðstæður með þeim hætti að hópslysaáætlun var virkjuð þegar í stað. Björgunarstarf stendur enn yfir og unnið er að því að flytja slasaða af vettvangi. Tvær þyrlur LHG aðstoða við flutning slasaðra. Ekki liggur fyrir með hvað hætti slysið varð en lögreglan á Suðurlandi fer með rannsókn þess. Sem fyrr segir er enn unnið að björgun á vettvangi slyssins og ekki hægt að veita frekari upplýsingar að svo stöddu.“
Uppfært kl. 18:50 RÚV greinir frá því að önnur þyrla Landhelgisgæslunnar er komin af vettvangi og lent við Landspítalann í Fossvogi.
Uppfært kl. 19:55 Alls voru sjö fluttir með tveimur sjúkraþyrlum Landhelgisgæslunnar á Landspítalann og Heilbrigðisstofnun Suðurlands. RÚV greinir frá þessu. Í tilkynningu frá Lögreglunni á Suðurlandi segir:
„Farþegar sem slösuðust í umferðarslysi er rúta valt á Rangárvallavegi hafa verið fluttir á Landsspítalann og Heilbrigðisstofnun Suðurlands til aðhlynningar. Opnað hefur verið söfnunarsvæði aðstandenda í húsnæði Árnesdeildar RKÍ að Eyrarvegi 23 Selfossi einnig er svarað í síma 1717.“
