Joe Biden, forseti Bandaríkjanna, er orðinn þekktur fyrir ýmis konar mismæli og rugling sem er vatn á millu andstæðinga hans. Í gær hélt Biden innblásna ræðu á opnum kosningafundi í Kaliforníu þar sem hann hjólaði í Donald Trump, fyrrum Bandaríkjaforseta og verðandi keppinaut í næstu kosningum, fyrir náin tengsl hans við ýmsa einræðisherra. Árásin missti þó marks því Biden ruglaðist og sagði að Kim Jong-un, einræðisherra Norður-Kóreu, væri frá Suður-Kóreu.
„Við munum aldrei gleyma ástarbréfum hans til forseta Suður-Kóreu, Kim Jong-un, og aðdáun hans á Pútín – þvílíkur leiðtogi sem Pútín er,“ sagði Biden í ræðunni og eflaust ranghvolfdu aðstoðarmenn hans augunum baksviðs.
Mistökin þykja vandræðaleg því ekki er ár liðið síðan að Yoon Suk Yeol, forseti Suður Kóreu, kom í opinbera heimsókn til Bandaríkjanna og borðaði með Biden í Hvíta húsinu. Þá hittust forsetarnir einnig á fundi í Camp David í ágúst síðastliðnum.
Þá hefur Biden áður ruglast á nafni Yoon. Í heimsókn sinni til Suður-Kóreu árið 2022 ávarpaði Biden kollega sinn sem „Moon forseta“ sem var þó aðeins skiljanlegra í ljósi þess að forveri Yoon í embætti var Moon Jae-in.
Í febrúar urðu þó enn vandræðalegri uppákomur þegar Biden sagðist hafa rætt við Helmut Kohl, fyrrum kanslara Þýskalands, um óeirðirnar í þinghúsinu í Washington árið 2021. Kohl lést nefnilega árið 2017 en síðar kom í ljós að Biden átti við Angelu Merkel, fyrrum kanslara.
Stuttu síðar sagðist Biden svo hafa rætt sama mál við Francois Mitterand, fyrrum forseta Frakklands. Mitterand lést árið 1996 en aftur kom í ljós að Biden hafði farið mannavillt og meint Emmanuel Macron, núverandi Frakklandsforseta.
