Maður sem lifði af árás Hamas samtakanna á Nova tónlistarhátíðina í október síðastliðnum segir að tæplega 50 gestir hátíðarinnar hafi tekið eigið líf síðan þá. Einnig að fjöldi hafi þurft að leggjast inn á geðdeild vegna áfallsins.
Samkvæmt frétt Mail Online heitir maðurinn Guy Ben Shimon og bar hann vitni fyrir þingnefnd sem fjallaði um meðferð eftirlifenda Nova hátíðarinnar. Áherslan var á að finna hvar brotalamir væru í meðferð hins opinbera.
„Það vita fáir af því en það hafa verið næstum því 50 sjálfsvíg hjá eftirlifendum Nova hátíðarinnar. Þetta var að minnsta kosti talan fyrir tveimur mánuðum síðan. Hún gæti hafa hækkað síðan þá,“ sagði Shimon.
Um 3500 gestir sóttu hátíðina sem haldin var rétt austan við Gasa ströndina. Hamas liðar réðust inn á hátíðina þann 7. október, drápu 364 gesti og tóku 40 gísla. Flestir gestir hátíðarinnar voru Ísraelar á þrítugs og fertugsaldri.
„Margir eftirlifendur hafa verið vistaðir nauðugir á geðdeild vegna andlegs ástands,“ sagði Shimon. „Sjálfur get ég ekki gert neitt. Ég þurfti að fá mér hund til þess að komast í gegnum daginn. Við viljum öll byrja að vinna aftur og eiga eðlilegt líf, en við getum ekkert gert án þess að fá aðstoð.“
Ísraelsk stjórnvöld hafa verið harðlega gagnrýnd fyrir að aðstoða ekki eftirlifendur. Í janúar fullyrti talsmaður ísraelska heilbrigðisráðuneytisins að engin aukning hefði verið í sjálfsvígstölum eftir 7. október. Þá hafa sjúkratryggingar verið tregar til þess að viðurkenna örorku og bótarétt eftirlifenda þrátt fyrir lýsingar á miklum andlegum erfiðleikum.
